Leke Do:yíng

         Ta:to Mentéké omma:ngé appi:ko dungéi . Odok awo ako dokké ommé aumkai.

Awodé monbang gamdagai.Awo dok aminém Mentak émtagai. Omé abí:ngarnodok  aminém Po:pír, ria: dokké Pi:mur Ame:nodokkém Oimuli émna gogdagai. Omé kídídé Kangkan dagai. Génam bomnam déméi géyum bomyumna okoloksin lupagpénam kamangéi. Taniyém kapé luposupénamméji édé appí:dém bulu kinsudagai. Atér bíro Mentakmé bírmé aumdé aipé aya:dagai. Mentakké gerpénam ager appí:dém bírmé aumdé gerpag bomdungéi. Édémpila Mentakbí lobagkang. Ta:to Mentébí awodém uryémílo omé kídídé:dan lenpo:la agerdém gerpag dumgéi. 

             Ngoluk taniyé lekelokkébong da:ro midang, atum midang, kumbosula la:nam, dugla la:nam midang émna midang da:la langkang gíka:mínsunamé du:daggomsin lé:sila kítíg gíla yatkang gíkang mínsula la:nam gínamdé lekkem abaya:pé solidungéi. Po:pir buluk kekonké do:lung dokké Montum émnam ya;me koko Po:pírmé aipé mé:bodungngéi. Po:pírbí:sin Montummé aipé mé:dagai. Bunyík yatkang méngka:mínsula aipé me:mínsunamdém ta:to Mentébí anbeg gamdagai.Émdaggomsin ta:tobí okkomsin lumangéi dokké Po:pírbí:sin abudém airupé kinmoma:pé kinma:némpé lé:sila Montummé mé:dungéi. 

               Yumékoném Po:pírbí goglígla Montumbí kítíg gila Po:pírmé kítígdokké luposula dungéi. Kítígbokké ma:sa:dagdo pisodok kurug karag émna bé:namdém ta:tobí aso:pé anna dungéi.Yo-yora:pé yuba:momapé kurung-karag émna méngé-saggéma:pé luposula du:namdém mé:yin sula:ma:pé aglíng sangkang. Édémpila ta:tobí big yupko mittug ru:yidok lé:nam dí:pitdém aso:pé langge:la yupgéng pisodém kurag émma:dopé kuryagge:la piso arudok ka:danna kítíg gíla du:né tanidém sudgappé émna mé:la sutpaklígto. Dí:pitdé dé:dannai kítígdok tolkuntadém dénggabkang. Édém ansula kítíggíné Montumbí kítígdokké dukkangku. Ta:tobí kítígdok tolkuntadém sutgabge:la kítík gíné tanidém sudgaptak émna mé:suge:la sémpé lukang-" Í salla magbodém aiyop paktak.Ngo ipé mé:do. Su:pag matkítok magbodé. Tolkuntado berru sudopé sugapdantag, siyum sad pak bima salla.Yampo réngémé ka:dopé le:polai minna émna ya:yo Pokimé luge:la ta:tobí yuppagkangku". Rokomdo míjí:dok darop ma:dapé minédé daroppo:la ya:me montummé sutgapla lé:nan dípitdém sadpagbige:la mélíkkupé émna mé:la gíyla kítígdém ka:namé taniyém ka:begtomang. Dí:pitdé tolkuntadémdan pagla sutgapla dung. Odo ya:yobí míjí:dém jé:bito-" Oi míjínga nok sutgabnam tani:dé matjéksula dukkangku". kítígsé kamang. Madjégka:né émna Tato mentébí luge:la anyisula aso:pé du:pag kang.

           Édémpila su:pagsin ngoluk do:lunglo ya:me ko-kangé ngenmínsula ajoném sémpé Luka:mínsudag-"Oi ataya ta:to Mentékémpé níggappéké dei kítíg gíyoka". Odo ajondé:sin sémpé lulad sudakku-" Matjégsula dugyékunéna ataya" émdag.

                     -------+++-------