Do:déng

DO:MÍG

MË:PO MIKSI

Abu ané takaméi ao -omma:ngém aitoka émna mé:dag.Olen dokké bottédo:pé porainam léga:pé appíngéi  tuptalok angkirém titpaksula ager gerra omma:ngém poraidag. Sékkaiké kané sí:né omma:ngé  mo:té:lo porila bottén tani:p baddag. Opannélok omma:ngé édémbulum ka:la miksém titsula kabla du:dag.Ané abué omma:ngém ainé tanip imoge:la longéko kamponé okumko mola, aipé dobo tí:boyékupé émna mé:dorung.

       Monbor bí aro opané. Aríg among kama:la ager gertasula longélokkém longngém mago;la né:ng omma:ngém dobodag. Bík omé Jaryum bí do:lu:dok sorkari LP Iskullo porila Murkong kamanggom  klas 5 dém pongapto. Su:pag Hai  Iskuldo popénammé .Jaryum bí:la Po:lo bí do:lung atéro:lokké. Jaryumké pojonsunam Po:lo mé abudé klas 6 dém dornam iskullo  poridopé  do:lung Iskul dokké la:pagge:la angu pogolo pomotoku. .. Po:lo ké abudé murkong kadag. Aríg- ísíng,  ga:ri- motor okoloksin pí:rammang. Bí kindag si:m sí:ro Inglish Medium lo porima:mílo omma:ngé aimang. Sakoriyém pa:mang.Édémpila Po:lo mé Inglish Medium lo poraito. Murkong kama:la Jaryummé abudé do:lu:dok Vensar Iskulí:do poritoka émna luto. Jaryum bí klas  9 do:pé aipé pa:s tíla gídung. Bík ajon Po:lo bí  klas 9 do:boi dami:né Haiphun, Mobilém rége:la mobile ka:la ka:la potiném podag. Google, Utube ka:la aipé ainé ainé agomém kinna:dag émna Jaryummé lubisudag. Édém tadla Jaryum bí:sin  Android mobile phone ko lagiyé émna abudém luto. Abudok ager gerreno:nanamdé dona -tí:nap idagong okolok mobile rénanéko pa:yen? Édémpila omédém luto- Omma, No amiké kané- sí:né omma:ng kídí:dém ka:yi:suyok.No Metric dém aipé pa:s mílopag ngo dami:né mobile ko rébiyé. Aiyop porito. Amiké Sité tayé ekolo silíngé emínna:donéi? 

Jaryum bí  abudok lunamdém tadge:la mé:pola yumé -ro:pé ,kene:pé pobomkang. Mirém ao Po:lo bí  ané abudok Murkongém kolang- kola: aima:né ajon jonna porilí:ma:pé duggongkang. Drugs, Ba:ng ,Ka:ni: tí:ropkang. Ané- abudé lékosin  luyirla:toma.Mirém ao émna luyitsugo:la gígo:dag.Okumdo:pé lékoném lo:nyi- loum kopé gíangéi kuma. Metric porika:do abudé Mastorém dorríg- dora:la dadapé 2nd Division pé pa:smoto. Po:lo bí drugs adicted la porinammésin aitoma.  lakh   Émpéi Inglish medium lo porige:la assamese medium lo mur- pa:r pangkuma. Odok pí:mang émna Drugs tí:yémílo. Ainé kolej lo:sin sit pa:MÍNTOMA 0. Édémpila Po:lo bí Line Hotel khulila ajoné abarungko murkong pa:dag émna lula ané abudok Murkongém korobbomkang. Abudé ao dok Drugs tí:la ,aima:namdém ka:la Murkong pidnam atí- atídém mé:batsula Hai- pressure sa::la sipakkang. Anédé Murkong bima:míloi aodé okumdok aro arém, Aín -Murkong lo:pé lé:sila bomna kongabdag.Anédém agom lusangéi momang. Matsíg, Yoktung léngkanna moríddag. Atér aosém abudé aya:badla mongabge:la sikang. Ngo kapé iyya:kun émna kabla du:dag.

Metric  porikang lenko:ma:dapé Jaryum ké abudé Murkong léga:pé do:nyi pédong kinma:pé ager gerra omédém Android mobile rébinam léga:pé  Murkongém kapé malenna:yan émna mé:dír dungai. Yummémsin asubdo yummi: a:mang Jaryumké légangé méngkolo. Longé lo:bu:do  ager gerge:la:sin yyummi:mang. Longékoném  Monborké ager gerra dungku:do bagémpé bík mobile dé   bé:ropkang.

Hello, Bau, ngok metric porikang aikang. 1st Division odokké  baumlok Later pa:la pa:sto.Do:lu:sok ngo atéro:ngé 1st Division pa:to.Po:lo bí 2nd Division pé pa:sto.Jaryumké agomdém tadbeksula 

Monbor bí mé:pola yirtosin. Yirténgí:do amigdokké miksé pari:pé bitkang. Aiyé omma,  Aiyé Jaryum.Nok Na:n bím lubitobon? Ngo nom ti:né mithayém bombiyéku déi, nok ajon kídí:dém party binalang émna luge:la phune dém abudé katito. Ager geram ge:la abudé okum do:pé gípí:dokudo omé Jaryum bí  abudém gonggab ge:la luto, Bau, No ngom Mobile rébinam léga:pé éddíko doma: tí:ma:pé agerém geryo. Ngom su:pag rébipé lagima.  Higher Secondary pa:s mílopag  rébilang. Monbor bí omédok agom dém tadge:la gonggabla aya:to .Oddung mé:po miksé amigdokké kinsuma:pé bor- boraila lenna kapto. Do:lung réngamé ,Ané kébang ,Porin kébang takamé  Monborké okumdo gíkumsula Jaryum mé érkokki boríksuto. Takamé murkongémsin abar- barnyipé urkumsuge:la bottép porila:dopé Jaryummé bito. Mirém ao  Po:lo ké porinam aima:nam agomém tíngko- dokolo  ané opeyé lula: lula aipé yirto.Drugs, bang tí:la Po:lo bí porinammé aitoma. Po:lo mé sék omma;ngémsin ajon jonmoyoka émna do:lungé ru:suto.Po:lo ké anédé édémbulum  tadla aipé anyi:sula gípakkangku. Do:lung réngam bidumsunam murko:dokki Jaryum bí klas 11 do amin adlíkto. Ëdémí:pé Higher Secondary démsin 1st Division pé pa:sto.Omédé  APSC pa:s ge:la  opanné taniyém ka:sí:yéku émna abudém lupa:sula kumto. Ané dé:sin mé:po miksé péri:kang. Opan omé Jaryum kémpé ménggabla porimílo tani:ké sigodé kamang. 

++++++++++++++++++++++++