JILI: dítag angngo,aumné lennam

JILI: bílenné mibang

Luyirné ope:

Dr.(Prof.)Jawaharjyoti kuli(Ru:tum luyirné)

Khogen Pe:gu

Kalinath Panggíng

Bhobo Dole:

Amilata Tayemili

Nébíngkolokké pirnyouko

Ísíngé du:mílo taniyé du:yépé,agomé turmílo opíné du:yépé. Ísíngé du:mílo mo:lungé gela du:dag,agomé du:mílo opíné géjígla jardag. Ngolu aíké opínsém turla du:mopé ané agomsém sé mo:píso jarmo-pa:yé,gejíg-gerola du:mo-pa:yé. Odok légangé takamé aíké ané agomsém lupa:yé odokké atpa:yé.

Mising agomsém mo:píso amiké rémné agom jarkampé jarmopé takam Mising taniyé mé:bo pa:yé. Aíké anémé kapé asinang odagji édémi:pé ané agomsémsin asinang opa:yé. Mo:lu:lo pétta: péyyíngé ni:tom tomdag,simín-sirré mé:po-mé:dírém lusarsudag,ísíng-ílíngé géjíg-gerola anse sedag. Édé appí:dé buluk aíké gomugé, buluk ané agomé.

Ngoluk taniyé ame: are:né opínnok ané agomém aíwé lusulí:ma.lupénammém anyí:sudag.Mé:mi:sula mé:mílo aíwéipakko anyí:supénammé aíké ané agom mé:boma:namdém.

JILI: opeyé édémbulum mé:danna aíké agomsém turmonam légangé agom mimagém molai émna takamém ajonpé jonsudung. Amikémpé rémmola:manggom simoge:mang émna ngengkutsuma:pé agerém gerra dung. Sé ngoluk gíténg bélamso okolai gímur-gíyarém ka:beksuyémílo sutkanbilang odokké kapin agerém germílo ané agomsém pu:po-jerpo mola:yén édém luyir bilang émna kumpa:dung.

Sa aipé

Mising réngam írroi

Mising agom írroi

JILI: lusar írroi

Nébíngkumsu

Debanondo Pe:gu,Ru:tum nébíng

Gulap Bori, nébíng

JILI: e-lusar

Kosag

Gomsar

Mising Agom Adnam

Khogen Pe:gu

(Po:pékodokké....)

Ménggappénamé—

Ako, Mising abíg kídí:dé kapéi poridaggom addagdo odobulu gomug abígé du:té:ma:yé. Édé okkoné, SRG admílo admuryé, SOROG émna atpa:yé. Odok luké:dé okkoné, addagdo mukténg kílí:dokké aíké lubéng kama:yé('Non-syllabic'-yé). Ngolu gomugém adlusul admílo:pag mukténg kídí:dokké lubéngé len-yé. Léngkanmílo—Sorog, Porog, Kopag—sémpébulu gasumko.

Annyi, Ruman abíg akolok lubéngé annyi-aumko du:la:do. Misí:lo moyinsunam Ruman abíglokké lubéngé ako akkongko.

Aum, 'Modified Roman script for Mising Language'do C,F,Q,V,X,Z kídí:sé kamang. Odo la:té:tung NG, NY, É, Í odokké : (Mugyar agod)dém.

Appi:, Biktap admílo NG-é la: NY, bíkta-bígme:p admílo Ng-é la: Ny, odokké bígme:p admílo ng-é la: ny—sémpé atpa:yé. Léngkanmílo NGO, PÉNYO; Ngo, Pényo odokké ngo, pényo—sémpébulu atpa:yé.

Angngo, Gompir ara:lo n-démna: g-dém odokké n-démna: y-dém atpansul atpénampé imílo n-g odokké n-y—sémpé atpa:yé. Léngkanmílo, Pon-gab odokké len-yé—sémpé atpa:yé.

Akkéng, Ng-démna: Ny-dém N, g-é la: n,y sémpé angu abíg annyilok du:pum émna mé:ma:pé Ng abíg akkongko odokké Ny abíg akkongko émna mé:pa:yé. Bulum atpansul admílo N-g-é la: N-y—sémpé atpa:yé. Léngkan—

Atpumsul admílo, Ngo, Pongab odokké Pényo, Tanyob—sémpébulu iyé.

Atpansul admílo, Pon-gab, Don-gab odokké Len-yé, Pen-yob—sémpébulu iyé. (Sé adnésok 'Mising Bhasha Aru Sahityo' potin odokké nébí:p ila la:lennam 'Arsang'é la: 'Gomug' lusardém pori ka:langka.)

Ngolu su:pakpé po:péké pogod dokki 'Abíg Kangkin' atkanna léngkanto. Su:pag anu adgod kokki lékoda 'Abíg Kangkin' adla léngkan-yé. Odok po:pé ngolu anupé la:lennam gompir ékkém kapé pa:tu:n, édémbulum kangkílai.

1. Abíg+atta/botta=Bíg-ta=Bíkta

2. Abíg+pirme:/ame:=Bígme:

3. Gomug+andéng=Mugdéng

4. Gomug+í:yar/ayar=Mugyar

5. Gomug+í:téng/luténg=Mukéng

6. Mising agomlo H(h)é kamang. 'Proper noun' adnan légangé Mising abíglo H(h)dém la:té:tung. Léngkanmílo—Himaloy, Khogen, Bhupen—sémpébulu adnan légangé H(h)dém la:té:tung.

7. W(w)démsin gomríksunam légangé la:té:tung. Édém atté:manggomsin adla:dag. Léngkanmílo,

Pao+é=Pauo=Pauwo

Dao+ém=Dauom=Dauwom

So:bulu émpésinéi atté:pénam kamang—

Ío+ém=Ííom,

Ía+ém=Ííém

(Abakoda lentíyé.)

AINÉ AMIPÉ BADNANÉ LÉKORLO OKUM KÉRA:RU:YI:LOK ARÉ

-Monuj Kr. Mili

Ainé amipé badnam lékorlo okum kéra:ru:yilok aréko kadag . Taniyé kéra:ru:yilok pagbo-pagné . Kéra:ru:yi kapé nomyéji édémpéi ajji:né ommangé ka:yir tadyirsula gído .

Okum kéra:ru:yi ( Environment) émmílo ngolu sémpé lula:do , taniyé okum ara:do,okum kérang kétakpé manggom kumrí-do:rí léko lakkola du:nam,dagnam,donam tí:nam ,du:lod yelod appí:do mé:po-ménganna du:tíng okum kumda:dém okum kéra:ru:yi ( Environment) émna lula:do . Okum kéra:ru:yi aimílo ommangésin yampo ro:pé ainé bélamlo gído odokké mo:rumso ainé amipé baddo. Kéra:ru:yi gompirdém Dr. J.J Kuli abuké Shobdo-Paríng potindok ka:yi:sula atka:la kangkítung .

Aík okum íra:déi ojíng omma:lokképé pobug poyirsuko iskulé . Ané abu kídí:dé bulum poyirné ru:tumé . Ojíng ommangé ané abuém ka:yir tadyirsudo . Ané abu kídíngé aglí: jírlí mínsuma:pé kangkampé du:mu-dagmílo ,aí aíké gerpénamém gerbommílo ommangésin bulum ka:yirsudo odokké aí aídéi pupo- jarpo bélam sígla gísudo . Odokki ommang aipémílo okum kéra:ru:yi aipé lagido émna ludo.

Okum kéra:ru:yi ( poribesh )dém ngolu baumkopé topansula ru:sula:do . Édébulu-

Amír attar kéra:ru:yi ( Bostubadi poribesh ) 2. Ané Abu Asin méngkin kéra:ru:yi ( Monubiggiyan poribesh ) 3.Réngam ngamnam kéra:ru:yi ( Samajik poribesh )

Amír Attar kéra:ru:yi : – Amír attar kéra:ru:yi dém Osomiya:pé Bostubadi poribesh émna ludag . Amír attar kéra:ru:yi émmílo , okum ríngong,mukong atí, so:bo- menjé,sité-gue,eyég-porag,aríg-ísing appí:dé gía:yé . Ngoluk Mising do:lungé abayangé abu: ru:yilo aríg ísíng ita- motasula turné ope:ko . Odokki ngolu abayangéi opandag. Ngolukké okum kumdangé aimang . Ísíng di:bangki monam okumém dítag tagyi taumdoi motentípa:dag . Odokki ngoluk okum kéra:ru:yi aimang . Ommangém aipé poriko pe:jongko angupé mobimang , poritíng soki tebulko mosí:bimang , kitab bihiko rébila:mang,génam bomnamko pídopé la:bila:mang . Odokki ommang méngkampé porila béttén amipé ila:ma:pé idag . Naré:né tí:nam así kamang, yési- tayé yéko okum kamang ,apin- oying yingko ,doko- tíngko okum angu angupé kama:la okum kéra:ru:yi naré:mang . Édémpiddom kinpí-lupíla:ma:nam kinam ramnamé lendag .

Do:lung kídí:dok kéra:ru:yipé ainé iskul kolej poriné ommang abako lenmang. Abayangéi potu-pongadge:la yamné la:nam ,amilo gínam , atí atí rajniti kéba:lo gígo:nam ,bi:dio atí mogo:nam , kanggo:nam idung .Édébulusin do:lung

réngamlok kéra:ru:yi aima:pé imodung . Jí:ma: le:ma:pé yamné la:nam gínamsé:sin réngam sokké aima:né lékorko . Bulu akke e:me madoku,akke amiké yamné dugbodung ,amiké milbongém ka:bodung . Édébulu do:lung kéra:ru:yiém ya:modung . Édébulu ajji:né sí:sang ommang pu:po-jarpo bélamlo motum- morumdag .

Ané abu asin méngkin kéra:ru:yi :- Ommangém ainé amipé badmopémílo ané abu kídíngé omma:lok asinangém ankurkinpé lagiyé . Buluk asin mé:bonam,ayang ,aglíng-jírríng appí:dém anpíng -kinpí:pé lagiyé . Bulum iman-moman bodagnémpé buluk lo:dípé gerpénam agerém aí aíé geryitsumopé iyé . Aya:dung émna méngkampé gíté-té:mang gímoma:pé moyum- luyumla aiko bélamdém léngkan pa:yé . Do:lu:lo poridído porimoma:pé okum agerém ommangém germonamémsin ka:pa:dag . Édémpiddom bulu poridído ménggabla porikuma:pé idakku . Poridung émna akke okum atí atí agerém okkomsinéi kinma:pé idag . Édésin ainé agoma:. Bulum ayang aya:la buluk ilí:nam appíng agerém moyirsula lédu-lamkupé ainé tani:pé turnané bélamko ané abu kídíngé léngkanpé lagido .

Réngam ngamnam kéra:ru:yi :- Ommang ainam aimang dakordé réngam ara:lok kéra:ru:yiém ka:yir-tadyirsuya:dag . Réngam ngamnam kéra:ru:yi émmílo ,réngam ara:lok ilam-gílam ,dírbí-dírlab,uyu-utpong ilam, ménggod-gergod, dodgang, midang odokké kéba: mibang takamdém ru:supénamé . Ngolukké uyu-utpo:lo apongém tí:dag . Okumlo:sin aríg ísíng ige:la apong batiko tí:rasudag. Réngam atí ili ikamlo:sin apongém tílígdag . Minom unapésin apongém la:lendag . Émpige:la siyum sí:ro do:lung kídído aíké nogin-po:ro apongé mége:la bojerlok lí:né apong,sulai-potikang atí atíém tí:robbomdung. Édémpila do:lung réngamé tíngursudung odokké kinamé a:dung . Apong potikang tí:la yumé ro:pé urraddung,abíng ame kangkin-mínsuma:dung . Édémpiné aima:né kéra:ru:yilo ommané odokké réngamé pu:po-jarpola:mang . Do:lu:lo rajniti lugé:la bírrang- yigo-magbo pamín- ge:mínsula ngolu kumrí-do:ríém ka:dum odumsunam kakuma:dung , rígbo ,daglíg kakuma:dung . Kébang atí lugé:la lo:dípé so:man yirman mola réngam kéra:ru:yiém urradmodung . Rajniti dalalé sí:sang ommang kídíngém simadmodung . Édémpidom ommangé ménggabla porila:ma:pé idung . Aíké dírbí bélamém mége:la amiké dírbíém irobdung . Ommang ankangém ka:suma:pé dodgang,po:rag atí í:rdíém ila porikolo ngasoddung . Édébulum réngam ngamnam kéra:ru:yi kísapé ngolu aipé mosi: ka:si:la:mílo réngamé pu:po-jarpo lékorém korra:yé .

Odokki ngolu kinné-pané ané abu kídíng okum írang ,kumrí- do:rí, do:lung odokké mo:légdo kéra:ru:yi du:tíng daktíngém kangkanpé du:bom yébomnamko appíng lékopé mé:pénammé . Odo ommangé ainé tanipé iyé odokké réngamsé pu:po jarpoyé .*

Do:déng

Anéké Ayang

✍️ Prasanta Kumar Pa:yeng

Longkí-22-05-2025

"Aobí anpona du:nya, kidungéisongka, asinsé son méngki: méngaddun, mobaildém níngkíramsunamé bojerungko ika:bo,léko lennyikopé bengge:la putuluk émpé katisudag." Aísuampé é:jodé nappang arangído lusu lumusula íngkolo gípéya-gíma:péya émna dakín damínsula gímíksula dungai. Dépé mé:dírla du:nam démyang gí:ka:la ka:namdéi aiya:yépé émna mé:la aodok aipé mé:bonam donam atíékké lompu-lommula mobige:la talíng ékkamlo kampopé kun-ge:la aídégom pinkang apinko dopu domula doge:la taonpé gíropo:pé mé:la ki:radok rakot atjaoko ra:dang leke:dok aíké tuptado títjet líksuge:la okumdokké dalendído rísu íra:dém jé:sala lutadsuge:la okumdém atjaoko ka:bidopé luge:la, odokké "bhonga ghoror pora jeneke hangi mati ulaisu teneke hangi mati thekabo lage" émna lula ko:ba:dém kumsuge:la gílenkang.

Édé longédé bojerungko gunamkokki é:jodé airu:pé ngasodém pa:dogom aodém ríksuyé émnamdém mé:la atípésin ansutoma. Taonlo tokla aodok amindém minla taugo taugo:la dadapé dungko okumdém oudné írgobnéko sutkan binamém ka:la miksé bérok émpé aísuampé dílensukang. Bí méngkang aobí anponangí du:pé,agerlok mo:manamki ngom ainam aimang kosin tatmo:pémang.Aidé méng-gosuge:la lottado dahadanpé inamé anupé yamné gíné né:ngko lukang"No se:kom madungan, bím ríksupémílo lédupé a:tolangkuka su:pak atjaoko kétjonsudoku,

rokom lokké:bo

kinam ka:yarge:kula,

gílen pongkaku" éjodé kokí kopakla bí aídé aodém kangkíkuma:namé kangkolo mo:téng amo:lokké gídung émna lubisudogom tatma:pé mélenlíktoku.Aodé anédokké mamínna toknamdém anpa:la bíkké ané émna kinmílo néng írang ami kídaré yírka songka: péké émna mé:sula lubisutomang. Bí ojingdodo amik ako kama:pé idagai. Dépidagém anédé aíké amik ako bím bipaksuttai, dépige:la

édé anédém aíké ané émna lubisupé ayingkan !? "Amik mikkere: la:mín ngom kang-gu tokuma:n." Mé:pí mé:lí suma:la anédé dolíng tí:líng a:ma:la médírkoki kinamé a:la sígít sirítla du:tíkangku.

Aodé Po:lo angngo lédupé anédém ríksukolo gídokudém sikí sipakla dungai. Aodé bogabla "kapikan na:n kapikan " atíko lupé mé:la:sin lula:ma:pé atíko sutkan ge:kula mikjemkang.

OPANÉM AYA:LANGA.

Cheniram Pangging

Jonai

Okoli: bí sí:sa:do mímbír bírra abako du:pangéi toma. Metrik dém bima:dapéi bím Jadob bí dugbola yamnépé la:to.Ané abudé boige:ma émna lémnyikopéi solatkaku. Émpige:la Oikoli: kélang Jadob ké aipé mé:mínsunamdém motumla:toma.Gíka:rung gíkang. Bík tuptadéi bíkkolo:pé gídopé ru:líktagbong émna mé:yin suge:la Jadob képé bitobong. Amilo gínam dítag annyi lédupé Oikoli: bí ao ko oto. Ao dé dítag appi:kopé idag lédupé Pogolo amin adlígla poridungnga:boi.Jadob bí longéko do:lu:dok érangkolo ager atí gerge:la okumpé gídokudodo lambédo ga:rié duggabla sipakkang. Jadob ké lo:tu:- yari:pé sinamdé Oikoli:ké sí:sa:dém kémmojíng émna yakané muksubé yí:lupto.

Abudé kama:pé ao dém kapé poraiyékun émna mé:la Oikoli: bí Mirémné érangkolo pagnépé ager gerge:la ao dém porai dungngai. Éra:dok né:dé tumbo né:ngém bík okumdo ager germomílo bík tani:dé ka:bopéké émna mé:la Oikoli:mé aimang aima:pé luge:la agerémsin germotokuma. Su:pag okolok pa:la doyén? Ao dém okolokki porainayén.? Ngasodé abala turra du:manggom aiyépébo émna yummé ro:pé mé:dírra ao dém kinkosuma:pé kabdungai. Atér ao dém mépagge:la amilo:sin gígu:mang.Okkesula sigomsin ngok atérmé se:ko ubiyén émna sagí gíla: gíla kapto. Ao dém Pogolo:sin poridopé mélíktokuma. Milbong ka:ma:la opanéya, Murkong kama:la opanéya, longéko dola , yuméko doma:pé Oikoli: ao kumsudé turra dung.

Do:nyi Po:lo Ru:né Píné bí kamang émpa:ma.Longéko Oikoli: bí ao dém gíjonna A:m kedné bottén mi:l do gíge:la sampég pédnam, Ambín kappu:nam ager gerra dungngai. Mi:l dok ru:tum dok né:dé Oikoli:mé sa:ng tí:bopé émna gokto. Odo Okoli: bí ao dém goksula biskuddém bisududodo Oikoli:mé tauto. Édé ko:dé se:kon? Oikoli: bí ngok atér auwo émna lubito. Bím kapila Iskul gímoma:pé ager gerkolo gígo:bodang émna minédé tauto. Odo Okoli:bí lubito, Bík abudé sinyodokké bím porainané Murkongé ngokké kakuma:laIskudém gímotokuma. Émpila ngo ager gerkolo gíboma:lí bí okoloi du:yén?

Oikoli:ké agomdém tadge:la minédé lukang. Aiyé Okoli: Yampo nok ao dém ngo pogolo amin adlígbiyé.Bík porinam léga:pé éddíko Murkong lagiyén, génam bomnam takam dém ngo biyé. Odokké no lo:dípé ngokkoso ager gernam léga:pé Po:lo do 10,000 pé Murkongém biyé. Minédog agomdémtadge:la

Oikoli: bí Minédok alédok sogabla kumge:la luto. No ngokképé Ru:né Píné bí. Ngom Murkongém édékkíddíko bimanggom aiyé. Ngok atér aomé poraibinamdéi pí:dagbong.Minédé odo luto:- No:lag ngo ainé tani:pé ila:manggom sé sí:sa:né ko:sém poraige:la yampo -ro:pé ainé tani:p imoge:la réngamsém ainé labréngamsémdopé imopa:yé.Nokké ao -ommang katoma. Bímméi ngo aíké auwompé mé:la poraipé mé:dung.No ajjoukosin mé:díryo.Ngo dung. Odokké nok aki:dok donam léga:pé, génam-bomnam rénané léga:pé nok gerré dém la:pa:yé.No silo bedné okumlo du:daggom nok ao dé ainé kamponé okumko mola du:boyékupé.

Oikoli: ké mé:po miksé amigdokké lennamdém ka:la minédé mé:pokang.

+++++++++++++++++++++++++++

Do:míg

Aku galug

Debanondo Pe:gu

Ba:ri:do tupagla lé:nam galugdém ka:da ka:dala kanggel Ba:tumbí ukumdo unga:líkto. Do:nyí-pédongé pa:la ajjo: ajjouko índungéibo. Aodok u:pagla lé:nam galugdém kanggel Ba:tumbí rénam adído:pé asindé gílad-kangku.

_________"Dukandok ainélok ayyangarné galugdém néryi: nérsa:ma:pé mé:líksula rébombitagakui. Aobí:sin mé:líksudanna gédagai. Ajjouko koyyang a:míloi kanggabdanna anédé:sin nípu:bigai. Gélíksugel gílendagdo ka:mín ka:mínna mé:podagai. Amme okkoi émna ka:daggom ané-abuképé édílosin ka:no-nomang."

Ojí:dokké ko:ka:dag,ko:ka:dokké ya:me: mímbírdag,odokké yamné gídí-la:díl omma:ngé parí:pé rí:dag. Ao-omma:ngém aimonam légangé aíké turdísok atakko bulum bigel usa:dag.odokké aso: aso:pé ané-abubí kétogné do:nyimé jonsula gídokudo pirasula sonnapé lagjunko lagidag.

U:pagla lé:nam galugdém kanggel Ba:tumbí mé:sukang,

________ngolusin galugdok akukampé akudu:bo. Longékoném ba:ri:do tupagla lé:yépé. Ainé tarung rungkolo gébomnamdém métungeibo,édílai tupagla léngkodo bédla bédla sé:kosin kinma:pé sé mo:písokké aíwé yokpaksuyépé."

A:r

Mg Sameswar Medok

"Ai ba:boiya, siddín yumé yora:so kémo kémopé okkom idun ?" Lolad Yeinbí tauto.

" Luyobongka aoa, podong oangkandung. So okum ru:yuso a:rpé émna meketang, atí atí jaborém yula ya:moge:la silo do:ré:la taksangge:la lopíla métungai. Olo kotiyang pitpé:kolo Jo:likpé émnana. Podong okatyem tebegyeje, émpila:na kémodaggom bosta:lo dunpo:du:né." Takar míjídé luríksuto.

" Airupé ainé agomé ba:boiya, rakayonik a:rdémyang gubor, atí atí jaborlok lenné a:rdé dekko aiyado. "

"Émmi:pila:na . Émlai kapiyen aoa, siyum-si:ro iyuriyang odok ati atí yogmompiné rakayonik a:r bila lígémpé si:monemém tanié mé:boya:dag. Kapé lígempé jarsa:la lomdanna lenyeji édém mé:bodag. Émpigel néríng agomdé sémpé, édémpé Ila pa:nam donam dola ngoluké amíré rémagya:ya:la

gíka:bo, kinam aba:kang, tatkí tatkíma:nam kinam a:bomdung.

180/5/2025 ; Bisonat.

Ayang

Jalendra Nath Dole:

Jonai Science College.

Aríg lokké ébong-kuyab jo:bomna: ukumpé gílad dokudo do:lung pongkokdok gípangsuko béda:do Mé:bombí Oisrí mé ríksula mé:pola yírra luposula dungai. Lídémpé do:lu:dok mírémne Matbor ké ao Sirambí buluk anu ga:ri:dém Oisrík ru:yido dukyírlíggél ílénla koyémla tauto- "Oisriya, no okkom ka:bola édé makpan nédém luposudon?"

Oisri bí ajjoukosin mé:míma:pé Siramé luto- "Bí nokkémpé ané-abu murkongki ga:ri dukma, sema:, laginamdém kola pamínsuma:, Mébombí aíké turnané bédangém kinsudag, porikolo aidag; Odokké magbo Sirama, no 'ayang' okkon kindon?"

Sirambí agom apirkosin lused ma:pé íkutsuma:pé dukkangku...!

++++++++++++++++++++++++++++++++

Nirbason

Amarawati Dole: pe:gu

Yumé-yora:do yamé:dok okum gíang-kunamde'm anbegla ayodé tauto "No yumé-kémmom kinsuma:pé sémmí:péi duggo:la du:ye'bon? Yamé:dé odo toríksudanla ayodém luto " No:sinsol silo ami jéngkolo alíng bedgédopé jé:la jé:la longé lo:bung-ko Nirdoliyo ope: lédulo dugminna dungan" !

Ayo-yamé:dok luker-luyer-mínsula du:dag ayirdo Karmugbí:sin tíngír-dongírsula tu:ta- tu:ma:la okum lottado pínga:doku. Aso:pé tomi:la tadge:la Karmugbí anédok-la: né:dok ge:min-lumín-suko arangí:do pe: pe: émna je:la lusangkang " Ngo alagédéi ngo alagé" e'mna.

Odo né:dé milbodém pésola rokondo ankangbikapé gípéné aode'm sobomna duksikang.

Yíryoka dei

Yoksa kuli

(1)

Moujang :- Ai Jogorama, no kapila ngok lenam íadém kérkan?

Jogoram:-- Ma: ba:boiya, nok lenamdé andéngounékka:min . Ngo odok sa:setkunédémmin kérkan.

Moujang:-- Émmílo okolok kérkan ?

Jogoram:-- Nérí:dogna.

Moujang:-- Kouwésiné, luma:- lumangé.Émpomíl okolok jongkan ?

Jogoram:-- Pongkogdogna.

*Yoksabí yokpakkang.*

Yakané yakasi:mé yoksabí ya:lígla yaddungai. Yoksaké yadnamki yakebné yakasi:bí yaopé yanggékang. Yongmom yonnusuge:la yoktung, yokpa, yoksém yorto. Yoksaké yornamki yatperné yapi, yakore:bulusin yatkosulíngkang. Yapi:bulu yatkosulí:la yoksabí yokpakkang.

Mé:tom

Pehelgam

-----------------

Horen Dole:

22 April, 2025

Pehelgam amo:lo

Agla lé:nam mo:písok ka:yum-kangkaném

Karbom-kangku

Pésin lépug pugné kídí:dé

Pérog légolo son-go:la dung émna kinsuma:né

Pumsu ma:nyíngé

Yambo gamigém ba:jonsula

Iy-abu:lo banggongkang

Lo:tung yariyé arra

Tani:lok obo-polum ayangé ngurkang

Kombong po:lodok Do:nyidé

Annyí:la mingmo pukomsukang

Pehelgam lottém

Metpakto

Ke:míngka:né mimag muksubé

---------

TOGÉSUNAM

--------------------

Joya Bori

Silo asin-a:ng béyag béyakpé ola

Du:di-dinga: la:ma:dung

Gompir pirríng pirténg pirté:lo

Bétum-bélum déngkampé dénggo:dung

Lolad-to:té-lo:léné nok asin-ayang mago:la

Ngo nok aipé mé:namo:pé badla dungge:mang

Ngo nok migang ga:namémsin ga:jon-sulí:dag

Gene do:mírtokké yardledné pé:dong ara:do

Tadgu:ma:né gomug mukténg sígla lomgésumopé mé:dung

Sa:len-sangkurné gejíg-geropé badla

Anupé karrenkuné

Po:lo loladdo

Gompir-torí-ri:yubla

Ménggo alab-lappola

Aín-kokki agnam régí-régamém mago:dung

Ma:nyíng muglam muglu:lo

Ngíryéru:pé írroi gomugé

Nom ményí:pénam okkosin kamang

Ngok mé:namdém-péyamsin no anguya:dag

Ngo kumdung nom

Agom kídí:dém tattí tattíla du:yoka émna

Ma:nyíng ollungém dula ruwad tadogém mala

Mo:písém yiryum-moyumém mola

Gené romlangkokki adgabyé

Do:dí-díkurnam aro rokangém kangkurra

Bipérung mé:dung nom

Pí:síng-pa:sí:la

Ngok ríksé:pé togésunamém

---------------------------------

ASINANG OLANGKA MIKSÉM DÍYOKA

----------------------------+-----------------

Mg.Debeswar pegu.

Udmara. Do:lung( silapather)

Asinangém olangka

Mksém díla kapyoka

Nokké ngokké do:yíngém

Néné konny kinpéké.

Ma: Emma lunamdé

ammem kinmo ma:nané

É. émna lunamdé

Ayang bimín sunamé.

Okoloi du:daggom

mom ngo ményokmang

Sjpan sudaggom

mom ngo mitpan mang

Sagí-gila duyoka

mé:dír mé:La du:yoka

Atí agom dudaggomsin

Yékla mélangka

no yékla mélangka.

So:yo-pakkom kapyémílo

Oinok. gomug tatpa:dag

Appun punnam ka:payémíl

Oinok ayang me:padag

Mo:térup du:daggom

Nom ngo ményok mang

Gípanoi sudaggom

Nom ngo mitpanmang

Sagí gíla du:yoka

Médír mé:la du:yoka

Atí agom dudaggomsin

Yékla mélangka

No yékla mélangka.

Asinangém olangka

miksém díla kapyoka

Nokké ngokké do:yingém

néné konné kinpéké.

----------------+--------------

LÍ:NÉ ABUG

Mg.Bhobo Dole:

Nok tuptado líné abug pundodo

Ngok angkéso mé:po gínmur a:dagai

Lí:né abukko nok tuptado do:nyipé kardodo

Ngok turying a:nédé biyyar biyyardagai.

Kérlumpé kérné ke:dang bame:ko

Nok tuptado abug bugdagai

Édémíng no dírbípé gédagai

Amil gínamlok agod-ko émna.

Bagémpé lí:né abugdé sansukkang

Do:nyi ka:sannam ísíng amí:pé

Mé:bo do:mírdo yakan mukkangé yi:lupkang

Mé:dír pédongé olumna pu:mi a:dopé

Ngo nok tuptadok punné líné appundém

Ngok alaksé jindung tarémo:tonpé

Apong tíngírsuné tani:lok alakpé.

Ngok amikso miksi pédongém dírumsula

Lakke alakki lí:né abugdém titpakto.

No gínotoku,ngo gímíndungku

Édílosin kangkíma:nam mo:rumdo

Lékoda ríksukupé

Mí:bo ayangko bimínsukupé.

Silo nok urom apiné

Nok bíro-bírmangé

Yigo-magbo gukumsulangkula nom toka:la dung

No gíayékupé émna toya:la dung

Nom toya:la dung.

......................................................................

Lí:né abug- ৰঙা ফুট,

ADÍPÉ OMA:NÉ PÉDONG

-Tuniram Médok.

Sanla du:né punlégdo
Punduk punné appuné,
Bérsa:la mago:dung
Nargo:nam po:lo lolatko.
Mukkang apom-pomnamém
Lo:dísiméi ka:tíla du:daggom,
Nok mé:bo-bonamém
Adípé anbeksuma:la
Ko:bomdung asiném arainé sagíko.
Mo:jarné mo:píso silo
Tolobolo:pé tani: yumrangé,
Dungké:so yinggo:dung silo
Yogmo kadnam ésaré.
Angngara:né rígang amo:lo
Do:ré:né amigé miga:dung,
Nok togésukampé
Adípé pédongko madunggom
Pí:sut-sa:ludné do:piddé
Ji:ma:né pokísém betkemodung.
Adípé oma:né pédo:do
Turgod ngasodém yonsula,
Aki:é sakeb-kebdung
Kéno:-no:signé néngané.
Adípé oné pédongém
Boríksuné ésing,yumrangé,
Lo:dísiméi kéra:pé madaggom
Gígéndung mo:téng-té:po:pé.
Jili:é asé:la moru:lígnam
Adí lékorlo kormínla,
Rongngampé bídné a:nélé
Silo tí:líng píkagdung.
Mukkang do:lu:to silo
Nom ka:ríksunamém,
Mé:pang mé:la asinbo
Miksi ílíngé longkabdung.

-------0------

O:ké ayang

Bhobojyoti Pegu

O:nok aya:dé kapiné ayangan

Su:paksin geyomna du:tíkang asin so..

Silo no kama:toném mé:padungku

Nok ayang kídí:dém..

O:nok niség dé ngok kínggí:né so:ponai

O:nok amírdé ngok du:po dunganné soyarai

Mé:pol yummi:do mé:po ma:nyingém kangko-ai

O:nok lakke: alaglok burasula

Turyi:sok korponam dakorém kortungai

Ngok miksém ri:pagla yirmodungai

Síkírla jinyémílo nok ingga:né angké:do bokoksudungai

O:nok ka:popagné dumsígém

Ka:rísuge:la mé:popé yirtagai

Lékoném yupkodokké kinsula

Nok mingmom ka:pangkuma:la

Míksé réjinna kapdungai atéré

Aroru:pé,

Silo-kokké no kakuma:bong

Sé do:ng amo:so

Ngo kabbi-suyékun sé:kom ?

Lékoda nom édílo ka:pa:yékun ?

O:no kindang....?

Nok nappa:lok leke do:yingém tadla yubné nok aínbí

Su:pak yumnané kusereyém dodag

O:no okoloi du:daggom mé:pola du:langka

Édé du:téngí:dokké ngom asé:langka

Ai kampopé du:dopé

Mé:dír

Mg. Bharat Chintey

Mé:díra ngok gíkolo

Gímínyobo

Bojeko ika:bo

Nom ajon jonnamé

Silo ngo mé:po

Lambéko mapo:pé

Ésar bi:bi:la du:po:pé

Nok kéra:lo du:tagbo

Mé:dír miksi bittagbo

Mé:dír miksi dílí:ma:bo

Mé:dír abung gora:do

Atér térla du:lí:mabo

Dénggo:né péttanga lubitei

Sarné ésara lubitei

Oko lambédok gímílo

Mé:po ajonko jonbegyen

Lo:nyou-ko turdoso

Mé:po-ménganna du:po:pé

LO:YID MIGOM

Mg. Ramkumar Kaman, Majuli

Nokké édé agomdé írga:dagai

Nokké édé mé:loddé mé:jubai

Nokké jé:loddé:gom jé:jubai,

Tani:bí silo taorpé ipakkang

Jé:robboné katokuma.

Nokké mimag monamdé mojubrungai

Nokké édé míryaddé arorungai

Nokké bélam gíkodé gíjubrungai

Kapiyékun misinga….!

Tani:bí silo taorpé ipakkang

Dagrobboné katokuma.

Nokké le:né i:lok turdung sido

Sikagna jé:nam gomugdém mamo:sudung

Tíngkoya:né tani:yé yuba:dungku

Kapiyékun misinga ……!

Tani:bí silo taorpé ipakkang

Gígéboné katokuma.

Ai tadbegma:nei……(?)

Siya: siya:na sikag sikagna jé:nambém

Sagí-sagína kabné migombém

Burné amongém partidmoyoka

Palongko lambém béladmoyoka

Moírnam kumda:lo gopar-parmoyoka

Siya: siya:na migombulu jé:tila dung..

No ngom aropé aipé mémané

✍️ Janmoni Kuli, Jonai

No ngom mé:dír mé:la dumogé:la

Kapé no mépo:la du:ladon....!

No ngom míksém díla kabmogé:la

Kapé no yírra du:ladon......!

No ngom aropé aipé mé:ma:nei....?

Nokké mé:díré ayémílo

Ngokké mé:po yogdak

Nokké ngasodé a:yémílo

Ngokké nganamé ngasoddak

Lo:tungko no dunggén yémilo

Asinsok mépo yogdak

Ampigé:la no kapila méngkinman

Asin kidopé kapila agommíng ludan

No ngom aropé aipé mé:mané...?

Nom ménga:dokkébo ngo

Silopé nommong mé:tila dung

Nom léngko ayang ukumso

Oinuko gía: moma:pé ka:sila dung

Ayang soyarémsin nommong mobitung

Ampigé:la no kapila méngkinman

Ngok asin agomsém kapila kinbiman

No ngom aropé aipé mé:mané....?

Ayang pédongé oyémilo asiné mé:podo

Ampigé:la, ayang pédodé ili ta:ngpé iyékumilo

Asiném démkur démyur la bédmik modo

Ayangé taniyém mé:pola turbodo

Ampigé:la, lo:tung ayangé taniyém

Simad dopé moyud pagdo .

No ngom aropé mé:ma-milo lutér sutobo

Kinsuman asiném simad moyobo

Aroman mé:bo manyingém ma:moyobo .

Rébat kama:n ollu:pé ngo

Punggo:la du:limang ané ara:do

Atér mé:la ngo kabla du:li:mang

Nok ayang pigodo

No ngom aropé mé:ma:milo

Ngokké lédulo no du:yobong

Atér térlai du:daggom ... Du:pébong

Ngom lo:tung ayang la:gima:bong.

*************

POBANG BA:LUNG

Mg. Lakhi Prasad Doley

Kompal Kama:némpé Turnamsé

Oril Kama:némpé Mé:namsé

Mé:dírko du:tíyé Turdakso a:tíyé !

Aropé dungkosé Bérong rongnga:mé

Turna:pé tornamko ru:mur mangapé,

Oné anébí tani: aopé Omur Mangapé

Tani: Aopé Tani: Orilpé Ru:mur Mangapé

Tani: Aopé Tani Orilpé Pí:mur Mangapé

Tani: Ao Orilpé Tani: Ao Kompalpé

Sé Amo:so Réyi Régí-Gí:da:sé

Régam Gambopé í:roi Pongkírpé

Pi:ro Aríngpé Rí:par Parko:sé.

Siang-La:li A:ne' Asidé Síkong Korongé

Rago Goradé Oiya Nokké Ni:tomdé

Jawbon Ugyumdé Tapung Munnamdé

Tase Selégé Réyi Régam Bédangé.

Ikorang Nérídé Miri Ao Rígangai,

Yínggang Ga:gí Gída:do Sulli Okumai,

Régí Régamlo Aro Okum Kumdangai,

Ísí Sí:lung Lottado Mirí Ao Do:yíngai.

Ikorang Po:yubdo Nogin Po:ro Tíngkodé

Pobang Ba:ludo A:m A:mro Pitkodé,

Péyyi Péttang, Simín Sira Ménkodé

Pétu Pered ikodo Sibe Be:sor Ménkodé

************************************

Asinsé adjoudag ,

Jitul kuli

Médag botta: bottapé

Lékoném Ésarkísapé sargolí:dag

Édilai Mukkangkísapé yinggolí:dag.

Asinsé adjoudag,

Manyingém ma:dag jad-jatpé.

Lékomném Do:mírtop ma:pílídag

Édílai Takar po:loki somannídag.

Asinsé adjoudag,

Médag botta bottapé

Lékoném Gimurkísapé yinggolídung

Édílai Péttangkísapé dénggolídung.

Asinsé adjoudag,

Manyingém ma:dag jad-jatpé.

Lékoném nitomko molídung.

Édílai paksongko so:lídung.

Asinsé adjoudag,

mé:dag botta-bottapé

Lékoném nokké gíko-gíkolo gímínnídag.

Édílai nokké dungko-dungkolo dumínnídag.

Asinsé adjoudag

Ma:nyingém ma:dag jad-jatpé.

(Pakko:ma- Kabdu:néi Gogdu:néi)

Anus yein

Dr.Bideswar Doley Migomké aminki mé:tomko,

1) Pirme:daggom Pakko:ma

Nok alíng gumug-déil tat-podag/

Yaka:daggom pakko:ma

Nok asin-déi kampodag/

Pakko:ma no-

Yumé yora:lo se:kom mala kabdu:ngan,,?

No kabdu:néi gogdu:néya ngom???

Ba:ko mag-bo, Ba:ko ta:to

Édémpéi ngom gogmíloi

Asinsé anpodag -pokkídag

Su:pagsin sí:san ya:me yémpé,,,,

2) ku:u- ku:u émnamdéi Ko:é-ko:é émdu:néya,

Silo airu:pé mé:po:dug,

Ojing ayirdok yammin Aminki

Oné na:níbí jagmanna gogdungai,

Pokko:ma no -Ngok okum bari:dok

Ke:di ammílo yumé yoralo

Lo:dém kapikan

kabdun ,,?

Nok kabla jé:na:mém

Tatpa:míloi yuba:la:mang/ dunga:la:mang,,,

3) Nokkémpé dénggo la:to:mang

Sidé mo:di:sém kala:tomang

Nokkémpé píwag aka:lo

Apíko umníg-kintomang

Nokkémpé tatpon abe:ko béngkintomang,

Nok jé:la jé:la kabroblo

Okum sumkenno ta:paré sa:lendo,

Appun amluyé parra- pallendo,

Néiyé néngané nganna- ngansado,

Pakko:ma no -Ngom simad moyoka

Yumé yora:lo

Ba:ko magbo /Ba:ko ta:to Gogla gogla ngom

Kinsuman asinsém Kukub kulad moyoka,

Ngo darab la:mang dula:mang

Sakkí: sakkí:l turra dung,

4) No lékoggom longé píwa:pé gílangka

Nok yakan adín amírdém

Ri:yi-risa:la ankala kangkípé,

Nok tatpon alí:dok gumukki

Oi -ni:tomko tatkípé

Nok yakan dumsíkdém

Asinbo jíggabla mé:kí:pé

Nok moimangko tusa:la mékípé

Yabgo lamtédo

Gílen gíyala nom ka:mano:la du:ngkípé,,,,,

Anuj yein,

Desang mukh sivasagor.

(6001976160)

Lambé Bélam

Ashok kumar Dole:

---------------

Appíng lambédogei gísuksuko alamé du:dak

Taniyé jo:lama:nam imurém lige:la

Ipa:ma:nam agerém germur suge:la

Édé alamdogei ségriyo:pé gísuksudak

Gíko lambí:dok gítíla dungge:la:gom

Ngolu lo:dém anu alamém kanggo-mago:la gídak

Sékkaiké amiklo:pé po:sa:la kangge:la

Amírdo bíbomnam agomém kinpé mé:dak

Appíng lambédogei gísuksuko alamé du:dak

Kané-sí:ne' tanilokké kapé turnané lambé du:dagji

Édémí:pé turnané alamé

opan-ki:pan lokkégom kadak

Yírnamé kapé du:dagji

Kabnamégom kadak

Tani:lokké onam lambé kapé kadagji

Édémi:pé sinam alamégom du:dak

******. ***"". **""" ***"""

Dhemaji

93652 54035

ISO:R ISO:R

Mg. Ranuj Kumar Payeng

Iso:r iso:r no gomugko bitadsuyya:mílo;

Iso:r iso:r nok moima:dém kabegya:mílo

No aroru:pé dung émna mé:lígkíppai.

No aropé du:ye

No émmumpé du:n!

Silopésin kinna:toma

Silopésin ka:begtoma

Silopésin rígsula:toma nom.

No okokoné

No se:koné

Iso:r iso:r

Luma:néi kama

O' my god

Kumma:néi kama.....

Hindu kristan

Si:k buddo muslim

Appíng yelamlok taniéi

Kindung nom

Kumdung nom

Bangkí bangkí aminém minnígla

No se:koné

Lubisutéika

Léngkansutéika

Nom kangkí kangkíma:pé

Gogdung ngolu iso:ré émna......

Ngokké ajon pí:ramdung

Adné:- Krishna kanta Dole: , Majuli

O sí:sané mímbír

O sí:sané ya:me

A:péné longédé nolugíngké

Mukkang yingkomna kémo ru:ru:é

Réngam tarung rungkodo

Pitumé pilumé kémoné lambédo

Migoma nollung méru rua:dé

Mising réngamsé pu:po jarpo:dopé

Ajona nollung daggur bopéné

O sí:sané mímbír

O sí:sané ya:me

Ngasod abu:dé bidla du:daggom

Opan miksí biddaggom

A:péné ligang longédo

Migoma gumrag paksong so:paru:yé

Mising dírbí yelamém

Tamuli takarpé unmopa:yé

O sí:sané mímbír

O sí:sané ya:me

Déllo pakro lentok

Mo:nying sa:yang lentok

Píramdung appíngé atéré

Kinné kinmang lentok

Opan mírém lentok

Me:noddung appíng agerdé

Du:pagdung ngasod kí:dí:dé

O sí:sané mímbír

O sí:sané ya:me.

Sé ngokké do:lungé

Punaram Narah,

Jomud chuk Majuli

Ngoluk do:lung obonori

A:né asé jiri jiri.

A:né ruyipé gílen yemil

Ésar sardag ribi ribi.

Yabjer Yakamiké okumelé

Ngoluk do:lung duteré

Yamné pa:mané Goloya bí

Do:lungarsok ateré.

Ngoluk do:lung miklat bí

Aipé nitom jéjongé

Yakasiké omé Déboi bí

Aipé maksong so:jongé.

Do:lusok ardayané tanié

bikké amin Bongali

A:né ru:yid lo:dém du:dag

Barikangé korali.

Ongom madag aríg idag

Sékom sin bí toyamang

Émpigel nédé bím

Ajjokosin ayamang.

Yumelokké apong démsin

Nédé tongel bilímang

Émpila bí édilosin nédém

Luposulímang.

Do:lusokké arangarsé dung

Béttagamné singi ísingko

Mírong okumdé kérangidé dung

Do:lungé ru:sudag so.

Ginmur po:lo Ligang longedo

So:íng so:man so:dag

Rigdom rikkong kekon kesaglokké

Appingé gíkumsudak.

Miklat bí ni:tom tomdag jéyar jéyarla

Déboi bí maksong so:dag mépo mépola.

Sé ngokké do:lungé.

Ngolu Aipé Mirémdak

Kiron payeng

••••••••••••••••••••••

Ngolu Aipé Mirémdak

Dung Ngolukké Agomé

Dung Angupé Génamé

Dodo Ngolu Nogin-Po:ro, Purang-Namsíngém

Okko Kaman Ngolukké

Ngolu Aipé Mirémdak

Éi Ajona Ngolu Aipé Mirémdak

Sé Anéké Agomsém Okolosin Pa:la:mang

Éi Ajona Ngolu Aipé Mirémdak

Ngosan Ongo Dopodag

Nogin-Po:ro Tí:podag

Mala:sin Pa:la:mang

Éi Ajona Ngolu Aipé Mirémdak

Sé Ngolukké Dírbísém Okolosin Pa:la:mang

Mitpanyok Anéké Sé Agomsém

Ményogyok Anéké Sé Dírbísém

Sé Agomsém Luma:míl

Sé Dírbísém Bomma:míl

Ngolum Se:ko Kangkinyen?

Éi Ajona Ngolum Se:ko Kangkinyen?

Anéké Sé Agomsém Lula

Miksém Díla Kappodak

Anéké Sé Agomsé

Ni:tom Mola:sin Tadpodak

Éi Ajona Ayang De:ko kPa:dakgom

Anéké Ayasémpé ila:mang

Éi Ajona Anéké Aya:sém Pa:la:manam

Karah Chapori Do:lung, Lokhimpur.

Sé ngokké do:lungé

Punaram Narah,

Jomud chuk Majuli

Ngoluk do:lung obonori

A:né asé jiri jiri.

A:né ruyipé gílen yemil

Ésar sardag ribi ribi.

Yabjer Yakamiké okumelé

Ngoluk do:lung duteré

Yamné pa:mané Goloya bí

Do:lungarsok ateré.

Ngoluk do:lung miklat bí

Aipé nitom jéjongé

Yakasiké omé Déboi bí

Aipé maksong so:jongé.

Do:lusok ardayané tanié

bikké amin Bongali

A:né ru:yid lo:dém du:dag

Barikangé korali.

Ongom madag aríg idag

Sékom sin bí toyamang

Émpigel nédé bím

Ajjokosin ayamang.

Yumelokké apong démsin

Nédé tongel bilímang

Émpila bí édilosin nédém

Luposulímang.

Do:lusokké arangarsé dung

Béttagamné singi ísingko

Mírong okumdé kérangidé dung

Do:lungé ru:sudag so.

Ginmur po:lo Ligang longedo

So:íng so:man so:dag

Rigdom rikkong kekon kesaglokké

Appingé gíkumsudak.

Miklat bí ni:tom tomdag jéyar jéyarla

Déboi bí maksong so:dag mépo mépola.

Sé ngokké do:lungé.

MÉBOM SUNAM APPUNÉ NO:

Mg.Sarbeswar Padi___

_________________

Ngo: Ésingé

No: Appuné

Ngoging képé pégbomna gétak nom.

Aso: aso:pé No: Sanna gédungku

Émdakgom ngok asin arabo Nok punna duné appundok aré dé

Supaksin namdak.

Longé koném no: aiyopé sanpakyéku

Sanna o:míg o:síg su:yéku

Émdakgom édé a:yirdé a:mangodo dopé

No: ngokgong képé ila: dupayé

Nok Appun arréongém nammo: pa:yé.....

Mg. Sarbeswar Padi

Bhimpara, Boginadi, Lakhimpur.

Ph. +91 7086887150

Yuba: La:tomang ngo

✍️Mg Kushal Mili

Yuba: la:tomang sé yuméso..

Ména:bomdag ngom aima:né ma:yingko

Duggén Duggénna duksi-sudaggom

Lédu lédulo dugmíndag aima:né ma:nyidé

Kapé dukpíd-suyen Sé yakané adísok

Aima:né ma:nyisém.

Sé:kon ngom jéyid-po:pitpé jé:robge:la

Okol duksikan Ngom yubamoma:pé.

Ajjouko yuba-ye:mílo aima:né ma:nyi:dém

Ma:robdakku odo língong bedgédopé jé:sang gédakku..

Ngo yuba:la:tomang sé yuméso

Sé yo-yora:sok rémi: jémi:né pédo:sé Ngok amiksog miksipé Díleddung

Télé bottén do:mírté ngok Asinsok Mé:dír gomukpé ige:la míryaddung

Ngo yuba:latomang sidé yuméso

Bojek do:nyi kanga:tonémpé ngok Amírsé

Orné ísíngémpé orang bomdung

Dorné ímémpé dora: bomdung

Dora: Bomdun..

..................................

“Mé:pa lamtédok Sígla Sígla”

Mg. Bidyadhar kutum

Gíkutsula ka:lí:dak

mé:pa lamtédok sígla sígla

Kangkin do:ludok gejík geroné aríg amo:dém.

Odo bidla dungai mé:jo mé:labné ayang abungko.

Méngkutsula mé:dungku mége:la gínam

Mé:pang ayirém

Muksup mugyupné so:bo Menjég lamtédo

Su:paksin ingga:la dung Gíné longélok

mé:pang akundé

Mé:pa lamtédok sígla sígla

tamnenna ka:dungku abor aborpé mé:pa potindém.

" Appi'ng le'kope' "

Simul Topon pe:gu

Majuli

Se' mo:pi'se' ru:ne'ke' biname'

Akon akone'm lu:ge' ge'mape'

Aouke' gomug,aouke' di'rbi' le'gange'

Kampon ager torunge'm runamko ilai

Ngolu abutanike' ommange'

Ngoluk du:te'ng- dagte'nge' kangkane'

Gomug gompire' unne' di'rbe'

Osom mo:di araso ru:wadne' ope:ye

Ngolu misinge'

Tadpo a:ne' ruingke' tu:tog mudname'

Ka:po ka:ngane' mi'mbi'rke' a:ri'g gi'name'

Ta:to ya:yoke' ra:binam la:sore'

Oe' ba:buke' so:boki a:ri'g inam

Pinkang a:pin do:bonam

Ngolu mising aoe'

Sa: re'ngam lentog

Re'ngam ngasad le'gape'

Appi'nge' le'kope' .

"Gíné ayirém pa:yékulang"

Sunil pe:gu

Ghuli do:lung

Pa:yé-kulang

Ngokké sí:sa:sém

Ayiré péttang alappé

Dé:tíla gíyé

Pangku ma:bong

So:bo gobomna ajon arumki

Rago summan summana asi ursunam

Ajon arum somanki

Sulli: okum momandém

A:né abung bangko:la

Rago ru:yi ru:yidok

Poka dugla dugmandém

Ko:labati kodmandém

Longédok lo:tungko

Édé so:mandok

Pa: yé kulang

A:lé gíko gíkolo

Nébílíng tíko tíkolo

i: épug jonggo:la

Péyyi: péttang mago:la

É démbulum mé:bola

Kinsutomang

Ayiré gíbítkang

Mépa su:la kapdung

Tuptém pisu pisula

Miksém titsu titsula

Okkom iton sí:sa:sém

Ager atung kama:pé

Ayiréi gíbítkang

Lékoda pangkuma:bong .

KO:YO PÉTTANG

Bhaigyeswar pogag

Ko:yo péttanga

Ésing aglégdo

Lé:si lé:sila

Anné pongkebdo

Sé;kom gogdun

Annying annyingla.

Kombong po:lo

Kabdu:néi gogdun

Jé:ug jé:ugla

To:te ro:re:né

Kítub kílubné

Ro: rokomdo.

Déngkangku ko:u no

Nokké amo:pé

Kamponé mo:dipé

Nokké dungkolo:pé,

Aiman amo:si

Ngokké légapé.

Déngkangku ko:u no

Nokké dungkolo:pé

Kapé kinton no

Kombong a:namém,

Kombong po:lolo

To:k kané alíngki

Sé:kom gogdon?

Jé:uk jé:ukla

Tani: amo:so.

Nokké a:bang tadla

Pundung jo:jogé

Mo:né sí:lul:o,

Nokké ni:tom talla

Ke:dang ba:me:é pundung

Ésing pongkeb pongkeblo.

Ko:yo péttanga

Dítag kelendarém

Kapé kinton no

Dígín-Díyu a:namém,

Oko kelendarén

Ngolumsin lubilang

Bírdug a:namém

Domanbopé nom

Bírdug amaném.

-B.Pogag,Pasighat

Agerém gerdung

Kanaklata tawmili

==============

oko ager gerpé nammén

Ngo silosin kinsutomang.

Oko agerdém ige:la

Turpé nammén

Édémsin kinsutomang

Émdagom ngo gertídung

Opan asin ukumso dungge:la

Aíké ainam légangé

Réngam ainam légangé

Aíké légapé asutko

Asutko akon akon léga:pé

Gita:dok krisnoké lunamé

Hokhi juddho kori juwa

Phol aka nokoriba

Émnam agom apirdém

Opan asin ara:bo mége:la

Ro-yumé kinma:pé

Agerém gerla dung

Ngo agerém gerla dung .

Sibsagar

Mé:tom

Shuvra pe:gu

Alumpé yinggo:né mukkangé

Ngok asin

Silosin kangkinei sutomang.

Yingkol yi:míndak nok kéra:pé--------

Éle ngasodé

Télé ngasodé

Ope:olumé , do:lung-sum-nyo

Míryadné potadé ---

Silo se:ko sikan ?

Ommang éddíko dungkan ?

Potad langgo:dodoi no yibaddag .

Lékoda

Yorang kísí:do kuruk karak émmango:pé

Mendarí lépoki no gía:dag----

Po:ladlai du:n ?

Ngokkolo:pé adnam do:jígdém

Édílo adamyén ?

Adamma:nam do:jíkkírí:dé

Ngok kéra:so urradla du:dag.

Yummi: yuptap pong-kogdo

No íksínggoni:pé dénga:dag

Unte: unte:la.🙏

Noggarkémpé

Kalpana pe:gu,Dhemaji

Sí:ta-sí:mal sí:sa:do

Ngo appun amíngko letungai

Appun amí:dém ngo

Assém pílígla

A:rém yarlígla jarmotungai

Koka:ngém kapé anné usa:dagji

Édémarpé

Longé longélo appundé parsa:bomna do:mírto:pé parpíngkangai

Odokké do:nyiké yalodo tettu:la dungge:la

Appuném punbomkangai

Appundé ka:pé nokgarkémpé idagai

Noggarkémpé

Longéko appundém daktok ésaré sarra sartap lígla

Appun kí:dídé pédo:pé oletkangai

Ngo okkoné émna bérsa:la ka:dodom

Appun apirko ngok yébu:so oankangai

Odokkéi ngok yébu:sé silopé arí namna dung

Noggarkémpé

(6001347631)

YUMDÉNG

Mg Jodu Bori

Yumdéng ayirdo

Ngoluk ya:yo napetibí

Ríngang arígdo

So:bo kanggabla dungai.

Édé ayirdo So:bodé

Ngoluk ya:yo Napetimé

So:bodé mé:dírra dungai

Sé yumdéng ayirso

Ngoluk ya:yo napetibí

Ngolum ayangmane.

Ngolu so:bodagom

Yumdéng ayirso

Ngolu mé:dírra du:dagman

Ngoluk ya:yo napetibí

Ngolum ayangko

Yumdéng ayirso

Ngolu So:bo asin kanéko

Ngoluk légangé tani: takamé

Yummé longé ayir pa:ma:bo.

SO:BO ANÉ KÉ KABNAM

Seniram Pangging.

Maksan míjí:dé mé:to.

Bohag Bihu a:dung

Omma:ngém anu galug rébinané

Murkong kamang abuké.

Amiké dobokampé ambug, pitang, gu:r rénané Murkong kamang.

Okolok pa:yén?

Se:ko biyen?

Agerkosin gerra Murkong pangko kamang

Fourlen, Baipas modung

Mo:té:lok taniyé

J C B, Drampar, Tektor

Dugjo:né yaka yakané, Nammurang

Tani:kídí:dé.

Ngolu Dampar dukkin ma:la

Lottasok agerémsin pa:mínma

Migom binam Orunudoi, PM kisan démsin

Néné ponné katpakto.

A:mkosin kama koge:la anu galug rébipé

Free ambín pa:la

Omma:ngé aríg itokuma.

Mé:da:mé:dala so:bo anédém

Koge:la Murkongém la:to.

Kopagnam So:bo ané dé

Lottado dugladlangkula

Ogo:banggo:la kaba:dungku.

Bauwé bauwa, Na:né na:na

Ngom nolu amikolo kopagyo

Ngom bulu tégla dopagyé.

Nolum mége:la ngo gípaglí:ma.

Nolum alédog oa:la kumdung

Ngom kopagyo.

Ngok kírongém tí:la

Akedém koge:la

Nok ao omma:ngém

Bottén tani:p poraitagai.

Ngok onam ao dokki

Aríg ila longéko aiyo:pé dotagai.

Ngo minétokuném nolu

Aya:tokuman é :é: é émna kabdung.

Ngo yampoké bihu do

Lekkíngkémpé nok lottaso

Kerela: bengena, holodi yonsula

Mé:popé du:lítagai, é: é.

So:bo anéké kabnamdém tadla

Abu bí:sin kabmínto.

Ané bí:sin miksé bor -boraila kapto.

Émdaggom luyir-mé:yir ge:la

Tukkudog ri:yidge:la.

Kabyobo émna luge:la

So:bo ané mé bepari:do kopakto.

Miksé pari: -pari: la

Ngengkud -ngengkutsula

So:bo anébí gípakkang.

++++++++++++++++++

Lubisulí:dung

Rahul Chandi

Kapé lula:yan ngok asin mé:namsém nok kéra:do?

Kapé lubisuiyan mé:nam agomém nom.

Lulen la:mang asin méngkísém

Nom lubisupé ,

Mé:dag lupé émna,

Ka:bekkumíloi lula:mang nom.

Mé:pí-mé:lí:mang ngok asiné nok kéra:do.

lubisulíngé sidag,

Épige:la bé:lenmang

Asin agomé nappa:sokké.

Ka:begma:míloi mé:dag ngo

lupénamsém lubídpé,

Ríksukumíloi mé:dag

lédígampéi lukupé,

Longé-po:lo dítagé gítídu:bong lo:dém.

Édíloi bé:lenyén ngok ma:nyíng agomsé

ni:tom-abe:pé do:ng amo:so.

Do:jíg