Apong

Yumdéng ayirdo Karmugbí bojardok oyíng attar rébomlangkula okumdo:pé  gípí: langkula teda:ngo: tagakui, éddído Karmuk mastorké iskul poraiko do:lu:dok Pakkom émnam tani:ko Karmugmé mala gído. Tedrasuge:la Karmukké yamné Oiséngbí tauto, -"okolopé gítagan agama. " Pakkombí lulatsutoku,-" sarmé lagila gítagai." Karmugbí gégusuge:la tedjonsuge:la luposuto. Pakkombí lukang,-"sa:ra murkongko lagila gítagai. Pagyémílo bisupo:lang, ngo kapéi pagdaggom bilatkupé. Aodé ankang légangé porom piluppénam lasded yampo émdag. Ngo okolksin mé:líg-méngangkoué kama:pé idung." Karmukbí anka:dém mé:la  murko:dém aiyo:pé luge:la bito. Odokké luto, no kapéi pagdang biladlangku.Murko:dém pa:la Pakkombí mé:po mé:pola gíkangku.        Karmukké iskul poraiko do:lu:dé takkírgí:tung do:lu:dé. Takkígí:tung do:lung taniyé airu:pé ardadag. Karmugbí anupé iskuldo poraikolo gíddom  taniyém ríksuéi la:mangai. Émpila:yam lékoném mé:dagai,-"do:lu:sé taniyé du:nei kama:nei ?" Aso: aso:pé annamé lékoné lambédok tíngge:la jé:la gínamém tadbéksangkang.Lékoném bímmíng lutégla lunamémsin tadbekkang.  Karmukké okumdokké iskuldo:pé bojérungko mo:tédagai. Longékoném Karmukké motor saikeldé aima:la do:lu:dok iskul ka:síng kébang abudok okumdo du:to. Yumédém dopé-tí:pé émna inamé rígdum éra:dé jé:tak-katagnamko tatpa:la tetkodokké durobla dungko éra:dok tani:dé dukkang. Karmukbí doge:la lasuksula du:namé gíladdoku. Kapila:n émna tadnamé tani:dé lukang, -" bírokumsudé apo:tíngge:la pamínsula abi:né bírodok mittubém dí:petto. Émpíla:yam gokkum:gokpa:la medikelpé mélíkto." Karmugbí mé:pangkangku bíg iskuldo gíbugdanna gído longédok lambédo tani: ako ríksula lunam agomko, -"no sé do:lu:sog iskulso du:yémílo ansula du:lang. Longngé-yummé kinma:pé apo: tíngge:la pamín-démmíé kadag. Odokké iskuldok mastorém airu:pé lukín-lumíném ludag. Sé iskulsok mastoré akosin miksém díma:pé gílenlangkuma."         Okumdok tani:dé apindém dobídge:la Karmukmé  do:lu:dok do:yíngko kíbito. - Sé do:lu:sok taniyé airu:pé arda:dak. Aríg idílo arígém idag odokké beparém mola, agerém gerla aipé murkongémgom malenjo:dak.Ro:lokké yumdéng airlo:pé ager gerla kumsu:lo a:mé bi:dak. Émpige:la:yam édílosin dogang rétéré kama odokké édílosin ui itéré kama. Uido lagidak po:ro apongém, tí:né kama. Apongém kéngge:la apongém répa:dak. Po:ro-nogin tí:né kakuma. Apongém réla tí:bokolo ui ako ikolo murkongé bojérungko gídag. Yumdéng ayir a:yémílo okumno apongém tí:ma. Ommang porinamdém ka:síngkuma. Tini Ali:dok dukando gíkumsula apongém réla tí:dag. Yampo ao-ommang galuk gasor rénané kamangom méngkut-sukuma. Tíngge:la gía:langkula né:ng ommangém dí:munsudag odokké bírokumso pamínsudag. Ané-abu agomém tatkuma.       Tani:dok agomdém tadla Karmugbí airu:pé o:rípé mé:dírko angkang. Sémpíné agerkídí:dokki ngoluk taniyé édílosin amik opín lédílo gípí:mínnama  Arígém bojéko ila:sin dogangé pí:ma. Yumdéng ayirdo ko:kang poridodo abué okumlo du:ma:la ommangé kabopé potiném poma. Émpila ngoluk taniyé bojéko ainé tani:pé ima. ReplyForward