Karmuk mastorké lutér agom

Ajjou ajjouné ko:kangkídí:dé akoném akoné luka:mísula dung, bottén sa:rbí kama:mílo ngolu iskul gíma:bo. Sa:rbí kama:pé ngolu kapé gíyén, rongngam pésamna iyé. Édémpé buluk lukamínsunamdém tadge:la Pakkombí ko:kangkídí:dém tauto, "nolu oko do:yíngém kídu:n ? Sé:ko kama:mílo iskul gíma:n nolu?" Pakkomké agomdém tadge:la ko:kangkídí:dé lukang, bottén sa:rbí gípagyékubo, ngoluk baubí lubidagai émna édé ko:kang ara:dok konéng ako lukang.        Karmuk mastormé ko:kangkídí:dé bottén sa:r émdagai. Bí koka:ngém airu:pé aya:la poyirdagai. Émpila:yam bím iskuldok poriné ko:kangé airu:pé aipé mé:dagai. Bí ko:kangém aya:la poyirla bík poyirnammém ménggabdagai. Ko:kangé iskul gíma:yémílo okumno:pé gíla ko:kangém makunsula iskullo:pé gíbolangkula naré:pé írpu:sumola du:modagai. Édémpé naré:pé du:mola kinam ramnamésin a:sodagai. Sé:kai longéko iskul gíma:yémílo kapila gítoma:ji okumdo gíla ané-abudém luposula ko:dém gíbokangkula poraidagai. Édémpige:la:sin do:lu taniyé sé:,kai kinam-ram nam a:yémílo bidum-birumsula aya:mínsudagai. Émpila:yam Karmuk mastormé do:lu taniyé airu:pé aipé méngge:la:sin ru:né-pinékémpé médagai.       Longékoném migomlokké Karmukkolo:pé do:jíkko bitak, bí Kangkan do:lung iskuldokké angu iskullo:pé mélikto. Édé do:jígdém pa:la iskuldok iskul ka:síng kéba:dok abudém pu:nla lupa:to. Ngo iskuldokké gípakpa:yé, ngom silo do:jíkko pa:tung. Ngo lígang longédo ngok poyir ajon, ko:kang odokké do:lung taniyém lutérsupé mé:dung. Édé agomdém iskul ka:síng kébang abudé aíké éra:do kímunsunamdém omédé ajonkídí:dém lumísula du:dom Pakkombí tatpa:suto.        Kangkan do:lu taniyé Karmuk mastorké lutér lupédak longédo do:lung taniyé kapé ipa:yén, bím kapé boríksuyén, édém do:lu taniyé ru:su-pasula do:yíngko kíbosuto. Lígang longédo rokomdokkébo donam tínamko moninsula appí:dé lékopé gíkumsudu:bo. Ko:kangkídí:désin gídu:bo. Odo longédo potiném poraima:bo,émpilayam potin bomna:pé gídung. Ko:kang kídí:dé luka:mínsula gídung,"kapé silo bottén sa:rké lutér lunamdém tadríksuyén ?"       Rokom adí konang ayirdo poyir abu kídí:dok lédílo do:lung taniyésin gíkumsudung. Édé longédo tani:kídí:dé sé:kosin agom luma. Odokkíddíko ainé tani:ko do:lusokké gípakupé émna idung, bíkkémpíné ainé poyirné abuko édílo pa:yékun ? Bík siloké lutér agomdém kapé tadrasuyén émna buluk ara:do kímunsudung. Asinkídí:dé mé:dírdaggom Karmuk sarbí kangkin-ma:dopé angké:bo menbomna du:bo. Ko:kang kídí:dé:sin appun doksiriko ri:bomtak bottén sa:rmé tulíkpé émna. Appí:dé iskul ara:do tetpum-tetrumsula akoné akonlo:pé ngengka: mínsuma íbumla du:taksudung. Lutér kébang agerém gerrob bompé émna idung. Karmuk sa:rké poyir ajon kídí:désin bím tedgurla teddung. Iskul ka:síng kéba:dok abudé bím do:lu:lokké dumérko tulígla do:lu taniyé o:kai imurém itogom no ngolum mé:yinsubilang. No okoloi du:daggom sido du:dodo ngolum kapé ka:síngka:ji édémí:pé nok du:té:doi do:lu: réngamém ibolang. Ngoluk méngkin-kampé no appíloi aimínsula du:la:yé.buluk ludak lédudo Karmuk sa:rbí darrobla bík lupénam agomém darrobla lukang. Ngo noluk do:lu:so du:do adíkídí:do ngo oko imurém idagagom nolu mé:yinsubilang. Édémo:pé Karmugbí lupa:to, gíkumsuné taniyé míksém díla kaptag kabyagla kabla Karmuk sa:rbí agomém lula:ma:pé angkéngé níngkabla agomdém lula: tokuma. Miksé bérag bérag émna díla okkosin émna lutokuma.sé:kosn agom lusangkuma:la lutér kéba:dé éddo:lok du:pakkang.ko:kangkídí:dé:gom bottén sa:rdok lutér agomdém tadla tani:ko sikanémpé kaptaksula Karmuk sa:rbí tadrík-sula:ma:la sé:kamsin lupa:suma:pé ngengkutsuma:pé gípakkangku. ReplyForward