Lí:len
Debanondo pe:gu, Jonai Sémpé kapé pédo:sé otíka:né. Silo longé longkéngko ika:bo pédongé oté:té:ma:pé onamé. Sémpiné ité: dísang po:lolok pédongé taniyém doma: tí:ma:pé menmodo. "Yumédokké ro:do:pé, ro,:dokké yumédo:pé osed-oyedla sé épo do:la ponamsémsin kotasukoko kama," Pakkombí aí aídé lusuto. Éra:sé:sin siyum pékangém adlígma:pé du:pa:yé, sé épo-do:lasém la:dag- la:manggomei ma:jon kolo:pé bomka:la ka:pa:yé. Sé ité dísang po:losok ngasodém pangkínédé:pak kindag. A:mé mina:du:bo, gatparsin gatka:nma, émna méngkum mé:pa:la méngge:la épé do:,lo ponamdém lamkudo atkoksuge:la jo:bomna yumdang ayirdo ma:jonkolo:pé gídag. Bomje do:lu:dok Takar bí botténé ma:jo:né, ngasodé a:yémílo do:lu: taniyé bíkkolok nartinsudag. Mé:la mé:la pakkombí ma:jonkodo:pé gípí:ngge:la luto, "ma:jona épokola: do:lako bomtungai , murkongko lagila, siyumké pékang atsa:líkpénamméi kama." Takar ma:jonbí amiké ngasoddok pongkogdo ta:ng pídnéiyébo. Takar ma:jonbi' lulatsuto,"ngokké édébulu appíngéi dung. Okkoméi inayén. ?" Ma:jonké agomdém tadge:la Pakkombí luto, "ma:jona, édémbulum lugo:yobo, ngom kapéi émdaggom siyum murkongko biríksupa:yé." Méngkum-mé:pa:laTakar ma: jonbí lukang," no éddíko ngasod du:mílo ngo nom murkongém bila:do, émpige:la no ngom a:mpé bipa:yéku."odo Pakkombí lulatsuto," ma:jona kapé sabyén ?" Takar ma:jonbí lubito ngom no murko: língkodo a:m mu:nko bipa:yéku. Pakkombí ma:jona a:méi gatkanéika:bo, édémarpé langkuma:pé língko annyido a:m mu:nko la:tokupéna émna lultoném Takar ma:jonbí ngokké éddéibo bepardé, no édémpé pagma:mílo oinulogéi mapo:to émna lukang. Pakkombí ma:jona aiyépé, kapéi émdaggom bi :boi,ngo nom biyéru:ngku émna lusuto. Odo Takar ma:jonbí Pakkommé murko:dém bige:la luto," Pakkoma, nok ao Ruadmé amiké lamkulo go:ge go:ge émna jénggo:la gímoma:pé télé takkírnéríngké bondokpé du:né amo:tém ngokkolo kolíkto. No okolok murko: pa:la dorren-yékun ?Odokké nok Ruadmé ainé beparko imoto. Amiké lédu lédulo duggo:míngge:la yumédom gía:langkula aíké okumí:do doa:dakku. No:sin míjí:du:bo, bím ainé lambéko léngkanto. Ngo kapé iyém murkongém bojéko pa:dagji édémpin lambéko léngka:n bipé. No siyum Ruad kokki ru:sulang." Pakkombí Takar ma:jonké agomdém tadge:la murko:dém mé:po mé:pola bomna gídungku. Pakkombí Takar ma:jonmé ru:né-pínéké adin amír géné tani:ko émna mé :dag. Lambé ru,:yiké dukandok Pakkombí ambín, oyíng, tulang atí atí attar rébomlangkula mé:po mé:pola okumpé gídungku. Lambédo Takar ma,:jonké lunam agom appí:dém lékoda méngka:la kangge:la kabodag émna mé:to. Yumédom apin dopé émn idodém Ruadbí kabbo: dopé gía:doku. Pakkombí Ruadmé apin domo domotu:la siloké Takar ma:jonké agomdém lubitoku. Ruadbí apindém dongabma:pé lasug suge:la aglíng sa:la darobkang. Odokké abudém taddopé luto, "Baua, agomdém aiyo:pé tatto, nolum luyum luyumla Takar ma:jonbí mokeyé. Sé do:lusokké among innyopkosin kama:yé. Takar ma:jonbí tani:ma, tani: i:yém tí:né tapadé. E'dé nolukémpin míjíngkídí:dém luyum luyumla amongém la:pagémyé. No méngkíto, su:pag a:mé Minka:bo. Pédongé oma:mílo a:mé gadla dokanka:bo, su:pag kapé murko: língkodo a:m mu:nko biyékun? Takkír néringké amo:tém bíkkolo kopagge:la ngolu okkom aríg ila doyén ? Longé koném ngolukkésin ainé longéko a:yépé, oddoi dorrenyéku. Bí édémpé luyumla amongém réngabamto, ngolukkédém métungéibo do:lu:sé sékké among innyopko du:bo:n ?"Ruad ké agomdém tadge:la Pakkombí luto, "Nolu sí:sang kídí:dé aríg-ísíng ima:pé édémpé bénggo: bénggo:la kéba: banggo:la édílo ainé longédé a:yén ? Taker ma:jonbulukkémpin tani:ko jonsula murkongko komaimílo yampo nomsin taniyé émna ménggésuyé." Abudok agomdém tadge:la Ruadbí luto, Takar ma:jonké ya:né asiném nolu kinma, bulu ui asin génné. Ngolu sí:sang opé:yé Takar ma:jon kémpiné réngam ara:sé éddíko du:ji bulum moyinsuyé. Bík nolum luyum luyumla rénam amongém bilatpa:yéku. Ngolu odogbuluk légangé kébangém ba:la dung. Migomlok taniyém luposula dung. Bulukkémpín tani: kídí:dé éddíko réngam i:yém tí:ladu:ji nolu kinma. Ruad ké agomdém tage:la Pakkombi' luto, "ngo édémbulum tadma. Nolu lo:bagé bagla bénggo:la dungge:la ammém aima émna su:pag ludu:n." Abukumsudok lumínsunamdém tadge:laRuadké anédé lukang, ommangém apin domo ma:pé amiké ainamo:dém luyitsula du:to, no okkom ila dungkan silo lo:pé ? Ané-abu binam amongém Takar ma:jono:kolo kopakto. Sí:sang taniyé édémbulum méngkinsula ainé lambéko mé:lendu:mílo aipé ainé ageré.Pakkombi' né:dém luladla lutoku,"nonyi anékumsudé kapé aidag émna mé:dagji édde'mpéi itobo. Ngomda:n Takar ma:jonké kéra:lo anyí:sumoyo." Ruadbí abudém lukurla lubito,"babuno édém ajjoukosin mé:pénammé kama, Takar ma:jonkolok éddíko la:nam du:ji ngo biladyéku. Ngolu migom amilo lupo sutag, migom murkong kumsung(bank) lok aipé ko:mpé u:dé bila murkongém naryé. Édém aso: aso:pé biladdakkugom aidag. Odokké sí:sang opé:yé, ya:mé- mímbír appíngé sé:kosin ager ima:pé tedla du:pé lagima, migomé édémbulum ager inadopé murkongém biyé. Aríg inné arígém inadopé, bepar inné bepar inané ,ege sumna kola dola:dopé migomé murkongém bidumsuyé. Takar ma:jonbulukkémpiné tani:lok sé:kosín da:ré narpé lagima, Ruad ké agomdém tadge:la Pakkombí agom luma:pé íbumna dungkang.
|
Comments
Post a Comment