Mé:mursuto

" Sikí-sima:la asubdo yubla du:né abunom silo o:ko luyébon ? Ngok kabla kabla ludagdoi ngok agomdém tattoma. Ngo:nu su:pag o:ko iyébo:n ? Daktoré ka:pídla:ma:la méladlíktakku. Bau:no éddíkoi turyéji dolí: tí:língko tíngge:la sila:bo." Pakkombí abudém ka:la miksíko díla díla aídé lusula dung. Pakkomké abudé kinamé a:la daktoré ka:pídla:ma:bo émna medikellokké gíladbotakku. Pakkomké bau Talombí kinam aima:bo émna do:lung taniyé akon-asagé gíka:la katérsukolo gídung.         Talombí lekkem mirémné taniyai. Kumsu: so:nyikolo a:mém pa:dagai. Amongé bojéko kala arígém ila ingabla:mangai. Do:lu taniyé bík amongém aríkpé ila Talommé airu:pé ménggésudagai. Talomké amo:do aríg inam légangé bím apong adiném bomna bomna dobola bík asindé bottépakpé mé:sukang. Édémpé tí:bo dobodouém bík tí:lod doloddé bík amírdo du:líkkang. Bík dolot-tí:loddé bojé bojéla gíkang.           Talomké ao appi:ko odokké omé appi:ko. Omé appi:dé amilo gíngapka:bo,ao appi:dé:sin yamné langabla dongusuka:bo. Odok Pakkombí Talommé du:jonsula dung. Talomké minédé:sin dítag annyi po:pélo:bo sikang. Apo: tíngge:la jénggo:la du: namdém anrasula:ma:la aokídí:dé dongusukang. Bulum amongém bipénmmém bibítto. Síla:ma:la Pakkombí abudém du: jonsula dung.       Longékoném Pakkombí luto, "bau nom ammé luyumna apongém tí:yírto. Nok arígém ibegla nom apongém bombila tí:moto. Édé bombinam apo:dé píma:la no silo amongém kokutsudung. Kai bulu among pa:pénammém pa:bítto. Nok tíngge:la lunamdém tadríksula:mal nok kéra:so:pé sé:kosin gía:la kangkuma. No apo:tínamdém komaito." Pakkomké agomdém tadla aglíng sa:la Talombí jé:yango:kang, "ngo amikolok kogo:la tí:ma. Ngom sé:kosin rotumpé lagima." Pakkombí okkosin émna lutumla:ma:la kapé iyén iyépé émna méngka:bo. Silo murkongé kadung apongém tí:dung. Yampo kinamé a:mílo sé:ko kidumsuyén ?     Pakkomké méngkamí:démpé Talomké kinamé a:la daktorpé gíbopénampé ikang. Kinamém ka:la ka:pídla:ma:pé idung. Silo silo, yampo yampo, kinamé aima:la amongém kotíla dung. Ka:pídla:ma:la daktoré méladlíktakku. Asubdo yubge:la sigín gínna dung. Pakkombí mé:du:bo, "sidagdo:pé dolíngém doyépé,tí:língém tí:yépé. Ngok lutumnamko tadya:mílo sémpé ima:yai. Taddí adídoi tattoma su:pag lula o:koi pa:yébon ?" Pakkomké mé:mi:la du:namdém ka:la Talombi' airu:pé mé:dírsukang. Odokké lukang, "Pakkoma, ngo ésa:la du:dom mé:murém mé:to. Ngo amiké luyumnam agomém tadyumsula tí:dom, doddém tí:bad dobatsuto. Ngo silo kinsudung, tí:jon dojon ajoné pí:ramma. Ngok kido adíso ajoné kama. Kinamém ka:la:dag, kinamém kidumsula:ma. Pakkoma, nok lunam agomdé lumurmangai. Ngo méngkinsudung. Ngokke' méngkinsudí adíé kama:bo. Ngo takamlo:pé lutér agomko ludung. Ngokkémpé sé:kosin tí:bad dobtsuyoka. Tíngko-dokolo odokkíddín among ba:riyém kokutsuto. Ngok kidoso koge:la kinam ka:sunapé among in-yopkosin métoma. Ngom sé:kosin ka:yi:suyoka, ngo me':mursuto.Édébo. " ReplyForward