Jili: dítag angngo annyiné lennamdok mé:tom kosag

Nébíngkolokké Pirnyouko…

Agomsém lubomsula du:ma:mílo n

appa:sokké gompiré

du:ma:yémílo

lakke:sokké abígé yogdak. Mising agomsém

pogolo pobeksuma:nammé bagémpé o:koi atpé émdaggom nappa:so lenma.

légangé ané agomsém turla du:molí:míl

nappa:sokki lutíla du:pa:yé,

lakke:sokki attíla du:pa:yé.

mo:písokké ngoluk agomsémpiné ajji:-ari:né

agom ako yokpé

o lagima. Ngoluk amiksok ka:bek

kampéi kérang ataksokké

agomé yognamém ka:pa:dag. Ngoluk-kés

inei bojérungko aíké agom

ma:né dung odokké lukin-ge:la:sin atkinma:né dung. Édémpé iddom

aso: aso:pé yognané lambélo:péi gídun émna lékoném mé:dag.

takamé édé agomdém ménggabla aíké ané agomsém arí

ager gerkampé gerbomna turr

a du:moru:yé émna ngolu mé:tinsudung.

Bílenné mibangésin sé:kosin lo:bagma:pé lamkupé ngengkutsuma:pé

agerém gerbomna dung odokké gertíla du:yé.

Sa: Aipé!

Mising Réngam Írroi!

Mising Agom Írroi!

Jili: Lusar Írroi!

Nébíng-kumsu

Debanondo Pe:gu

Gulap Bori

 Mé:tom

Nom Pa:míloi Aidag 

 Khogen Pe:gu

Oiya, nom pa:míloi aidag 

Odokké ngom okkomsinéi lagimang 

Do:mum-do:réng gébomna 

Nge:togla du:né do:mírko 

Odokké odok kéígdo 

Do:mírto:pé nge:sa:la 

Toya:l du:né mo:píko 

Oiya, ngo gía:pé 

Nok aki: ara:bo 

Nok ma:nyí:p ila 

Ngok ma:nyí:p ila 

Oiya, nom pa:míloi aidag 

Odokké ngom okkomsinéi lagimang 

Ngonyik ma:nyíng kokki 

Télé do:mírto ésaré saryé, 

Ngonyik ma:nyíng kokki 

Sé mo:píso pédongé oyé 

Odok lédípé 

Néi néngan ngansa:yé 

Appun pun-yé, a:yé e:yé... 

Oiya, nom pa:míloi aidag 

Odokké ngom okkomsinéi lagimang 

Nom aipé mé:namong kokki 

Ngo okum ako moyé 

Odokké aríg ísíng ila 

Sé lo:bagné mo:písém jarmoyé 

Oiya, nom pa:míloi aidag 

Odokké ngom okkomsinéi lagimang 

Kapila:né 

No ngok asinsok 

Minna du:né ke:di: a:yé 

 

Ngo kindag, sé mo:písé 

No la: ngouong 

No la: ngo kama:mílo 

Sido oko agerésinéi kamang 

Ma:nyíngésin kamang, 

Do:ng amongésin kamang

Lagimang Ngom 

Sidag Lédupé

 Horen Koptak

Lagimang lagimang 

Nok ayangém 

Sidag lédupé 

Lagimang ngom 

Miksi sibugém 

Ayang alumém 

Sidag lédudo 

Lagimang ngom 

Luyum moyumém 

Mé:pa: mé:líg 

Kébang ké:lungém 

Angun ba:lígla 

Angkéng kilígla 

Kumnam nok 

Do:sog yarungém 

Lagimang ngom 

Sormon miksi dínamém 

Pagdan-yém gérumlang 

De:lum alumko 

Asin oyém u:rumlang 

Kampon gasorko 

Kekon mo:tagbo 

Mé:pola yubnanéko 

Kekon mo:tagbo 

Mé:pola yubnanéko!

Lígang
 Sameswar Medok
Nampo namané
Ngokké among
Du:po dungané
Ngoluk do:lung.
Gumrag gumrag
Kekonélé gumrag
Kekonsé:sin gumrag
Gumrag rag.
Lígang Lígang namdung
Ésarlo, do:mírlo
A:la lígang
Ngoluk asin mé:podo.
Singgi appun pundung
Anu bírdug a:dung
Ginmur po:lo a:la

Ansí:n ésar sardung.

A:néko Dungai

Bhobo Dole:

nésé rongngam-pésampé atérdé dung

Rokomdok rémagné do:

nyi gadudém bomla

Ongo-opuné mé:po mé:pola

Simad maddung

Simad maddung.

nésé rongngam-pésampé atérdé dung

Mímbírko pígodo da

:li pimpud mola ba:mandolo

Ya:meko tu:tog muddung

Ya:meko tu:tog muddung.

né boggosok sulli mo:mi:do

Gírgum pétangé réyonpé dé:ran randung

Gírgum pétangé réyompé dé:ran randung.

si pi:riye, ki:komballiyé

pin-dépong motaksula mé:podung

Dubori dégmígla so:mandung

Dubori dégmíla so:mandung.

tum go:norbí: kortag tagla tagla

lung gompodém donge: ngomdung

lung gompodém donge: ngommodung.

né ragodo so:bo-menjeg amírdo

mír ma:pí:dung kampon kampu:bí

mír ma:pí:dung kampon kampu:bí.

mírtok kampon mukka:tém

:sa nge:sa:la ka:ladung nobílíngé

Nge:sa nge:sa:la ka:ladung

-néyangé, nésin-néyangé.

Pétu appuné gelubla kangkandung

Turnan ma:nying légo éddíng dung

Turnan ma:nyingé légo éddíng dung.

Pémí-pékamé sérmi: sermígla apta gídodo

Ongo-opuné pékong ngundung

Ongo-opuné pékong ngundung.

né sé:bomna ísíng réngke:do

:pol ni:tom modolo

lo miksi díla, Kaptag-ri:tagdung

Mílong péttangdé mimag modolo

nyi owa:la yumdéng a:dodo

Tangkí mariyé mí:dum dumdodo 

No:lang Ngo

Okumko Kumla:je

 Ma:nying Panggíng

No:lang ngo okumko kumla:je

Gé:yar gé:yarné ayang karé okumko

Mé:po obud oyutsul dungko okumko

Po:lo takaré duksi dugmanna dukko okumko.

No:lang ngo okumko kumla:je

Odo okumdo kama:ye mé:dírélang ngasodé

Odo okumdo kama:ye lukér kérnamélang méngu mé:roé

Odo okumdo kama:ye aglíngélang kabnamé.

No:lang ngo okumko kumla:je

Odo okumdo dungge:la ma:nyingko ma:la:je

Do:nyi po:loké do:lu:lo:pé gínané ma:nyingko

Gi:tu jiko:né lamtém mé: mo:ma:pé gínané lamtéko

Odo okumdo dungge:la mé:po amli:ko pidla:je

Gejig gejikpé gela du:dopé mo:pí amírro

Donggum gumla du:yepé asin mo:léglo. 

No Kama:né Líga:so 

 Tuniram Médoki

Gíné dítagí:dokkémpé 

Nok gínamém mé:pa:la 

Kampon mibu galug gédanla, 

Sidné anéké lédulo 

Nok kérang aninpé 

Ali-A:yem líggottag. 

Étung Asi, Apongki 

Petom-pekil írdanla 

Takuém ku:battag, 

Pi:ro so:piko ígyedla 

Muglíng, Ya:ri, Karsing, 

Kartang bulum kumgéla 

Lémngoko yadri:la so:líktag. 

Murong lottélé gumragé 

Do:mír ésaré Lo:le: ni:tomé, 

Lígang mímbír dumgaglo 

Anse-sedung Lé:bangé 

Ri:bi-gaseng ogyabla 

Yirdung Lé:no, Barbangé. 

No kama:né Líga:so 

Kéno: tí:língé ngok do:lungé, 

Agín kisapé nom lugé:la 

Ampi purangém ra:tag, 

Lígang simad-madné yumdé:do 

No gíyeru:pé émla 

Ang toya:la du:títo 

Longoko yodla dungge:la 

Ménnyingí:kémpé sinyi:sin 

Lí:sik, Ki:rém píde:la 

Nok kamangém ka:la 

Mé:po pa:ro írmanggom 

Ali-A:yem li:lentag. 

Yumkur 

 Sondro Jyoti Dole: 

Mé:boma:nam dumdum to:rídém 

Mí:dum tale:to re:sangge:la 

Sé:ko démníkton! 

Bé:sangka:n okolokké! 

Asinang ara:bok asiném ma:la 

Dukpid dugritsungapkang 

Nom 

Ki:rukpé ruggo:la maladlangkula 

Asiné singagdag 

Ta:ng ílíng ansíngém 

Kampon gasorém po:titto 

Do:nyi owa:pé boyupkodokké 

Daroptokumang 

 

O’ ngok mé:bomsunam mipo kídíng 

Ngo sila: yuko-yurumkodo 

Ngala:ma:la 

Lékoda ngo siyékupéma:n! 

Édílai édé pésodé nolukkégom a:dang!

Líga:sé Írgangé 

 Bidyadhar Kutum

Írga:né mere:pé unné gipundé 

Lígangém mé:pa modung 

Lakutné singgi:do tettu:la dungge:la 

Lígangém boríksudung. 

Kampo no lentoka Nampo no lentoka 

Ajon arumé appíngé lentoka, 

Mosangém gétoka gaséngem gétoka 

Kebrégdém aiyo:pé keptoka 

Géru:-bomru:suge:la líga:sém írga:pé ilai. 

Ma:mo Kamposi segrégdém ségyuma 

Ígíngém kínggí:pé yéréksutoka 

Pérabdok po:rodém, rabbé:dok nogindém 

La:yingge:la tontoka. 

Mamo kangkana, kebrégdem kebyuma 

Érkogdém pe:lenna lé:tei 

Gonro ugon gége:la mibu galuk gége:la 

Lígang líggoddém ka:pé, gumrag songkolo gípé. 

Oiya oikoli gérodém géyuma 

Ígíndém tulíktei 

Ki:rug rukkolo gípé. 

Bíro Yabjera ardané kouwa 

Ajonko goksula ékkamko nadlangka 

Ba:boi Bonggída, ka:koi Lékida 

Pagmílo nonyisin pi:roko palangka 

Aliyé uliyé mayongé pagliyé 

Ya:yobí ngundanla lé:tak 

Ardané ma:mo no Yasiné ma:mo no 

Appí:dém lékko:pé ra:lígla lé:langka 

Baiyé:bí gíyéku magbobí gíyéku 

Nanyibí gíyéku ka:kíbí:sin gíyéku 

Líga:do appíngé lékopé dolai. 

 Nom Okolai Kangkítaga:i 

 Noyon Lígang 

Okol kangkítaga:n mé:beksukuma 

Ginmur ésarkolo sara:dagai nok aminko 

Sarténg sarté:lo namjerdungai mímbír aréko 

Nampodém namkíla mago:míndodo 

Lambédé yokpakkang guni: aríg rísudo 

Bérpí: bérsotpé bérkítaga:i rígu bugrumko arígdo 

Nom okolai kangkítaga:i gumrag songkodo 

Angké:sém ki:parpé ige:la 

Donamko ídu:némpé ídaga:i nok laksa:la so:namdé 

Nom kangkípé mé:la:sin ka:la:tomang méngkampé 

Kémon yuméla 

Lékoném lounko rulíkkítaga:i 

Kinsunémpé dumpundém kepsí:sula no íyodlíkkang 

Ka:líng abayem kapidang kindon 

Longédéi dítakkonémpé idag 

Yubrobdéi yumékonémpé idag 

No pígopé gílenma:ne 

No attar níma:ne 

No ursumanggom naré:dagne émna mé:namko a:dag 

Nom ka:língé bérgabdanna 

Luposulíngé ígabdanna 

Nok alagdo ngok asinsém bigabge:l léngkanbipé 

Asinbok éddík ara:pé nom lé:tagji 

Ngok amiksém nokkodo karrígge:la ka:mokípé 

Éddíko o:rí:pé ma:nyingém ma:tagji 

No:mín arrompé mé:ma:n 

Nok yalolo:péi ngo kangkindag 

Po:lo sirugdo:sin gedop sa:lendag 

Takar loundo:sin kampopé unlendag 

Nom okolai kangkítaga:i

É: mé:pa:dungku

Muksubém darpansuge:la pétu appun ara:do

Mui mu:namém ka:la kangaksula du:dodo

Síkírdo yedbomnam ri:bi gasengdé:la pétu appundé

Muksub ara:do ki:né na:ném gésudungai

Nom aropé kangkíma:ya:mílo

Kapé lugabla:yan nok agomém

Aropé ríksukímanga:mílo

Kapila gíyoddang ngom ka:mílo

Kapila íyoddang ngo bérmílo

Okolai luyinsula:ma:nam lujegém jéktone

Mé:yinsula:ma:nam imurém itone.

Mising Agom

 Simul Topon Pe:gu

Boralimora

Ngok agom gomlabé

Gomug luyar gompiré

Tatpo ta:dané

Ngok mising agomé

Sa: Mising anu ya:me:

Anu mímbíra lentok

Ngoluk agom gomuksé turmolai

Mising gomsarém adlai

Agomsém turyarmolai

Ngo Mising ao

No Mising mímbíré

Lo:dípé luposulai

Mising Agom gomlabém

Mising gomuk gompirém

Pa:me: appunpé punmolai

Lo:dípé turyarmolai

Mising agom gomlabém. 

Ríksulangkupé Líganga 

 Bharat Chintey 

Ríksulangkupé líganga 

Angkuné ginmur po:loso 

Gonro ugon, mibu galug 

Lí:jíg lí:ron érkokki 

Írga:pé boríksukupé 

Ngonyik ríksukunam lutadém 

Ginmur po:lobí pa:mílo 

Ginmur ésarém sarbiye 

Singgi appuném punbiye 

Ríksulangkupé líganga 

Ginmur po:lodok a:pongarné 

Lígang longédo 

Yari:pé yarpakkuma:pé 

Ésarpé sarpakkuma:pé 

Do:nyi po:lomé suttomna 

Rugji merangém lutomla 

A:m amli:yem pidyeku 

Ríksulangkupé líganga 

Angkuné ginmur po:loso 

Purang apin légangé 

Ampi a:mém ídopé 

Oipuli:mé lutagbo 

Péro ampém romdanna 

Po:ro apong modopé 

Na:né mélang ya:yomé 

Lumo lumol lutagbo 

Ríksulangkupé líganga 

Dumdum denduném démna:pé 

Lé:nong marbangém manna:pé 

Kangkan ka:yumné mímbírrok 

Asiném artég arrégdop 

Tu:tog tapungém mudla:pé 

Lo:le so:la dungkodo 

Lo:le ni:tomko mola:pé 

Mé:bo Muksub 

 Migrob Dipen Dole: 

Muksub muglubé yí:lubdung 

Ka:sar sula:mang 

A:pí mé:dub mé:lubé 

Mé:sar sula:mang 

Ruwadé ladlen yekumílo 

Nok mé:jon a:pídé 

Ngom mé:pa: langkuka. 

Ayang gíténg bélamsém 

Yumrang parkomyéneya 

Mé:bo ga:nédo ba:ying moge:la 

No Pínmoyéneya 

Ngo pososudag. 

Facebook do:sin ríksumang 

Ma:nyi:bo:sin ka:sumang 

Lékoném ríksuyékudi émna 

Ngo kanggo:daksin 

Ajon arumémsin tago:dag 

Émpige:la, 

Oko botorangémsinei pa:mang. 

Ngok ayang yabgom moge:la lé:yé 

No mé:bo muksubém yí:rong moge:la 

Ayang lésígém síggabla 

Gíang langkuka 

Ngo toya:la du:yé.

Durbin 

 Ashok Kumar Doley 

Ngok asin ara:bo 

Bíkín-bíle:la dungngai 

Mé:dír gasumko 

Édé gasumdé ngom so:man modagai 

Assé kapé kagdagji abu:lo 

Mukkangé kapé yínggo:dagji do:mír talé:to 

No mé:dírdok kola 

Nom ngo innyopko bisuka 

Ngok binam mé:dírdokki no yumé-ro:pé so:manna dung 

Ané kéra:lo ko:ka:ngé kapé so:mandagji 

Ngo miksi titsu-titsula nok so:mannamdém ka:la dung

Édé Ma:nyí:dé

 Ranjan Kr. Kaman

Di:té kéígdo kémoné yumédo

Ka:so: ka:moné 

Jéyid-po:pidé mo:písé

Okolai yumé dogon pétangko kéno:la kabdung

Ka:sud ka:ludla lígémpé ka:pa:to

Yaka: yakané yalo

Do:mírto takaré unnna dung,

Mukkang kekonto po:lo loladé mimag modung

Édé okkan! 

Mé:mil mé:la:sin mé:be

Édé kémoné yumédo atéré

Dilung pongkogdo bíkén

Tolopé ka:daggom,

Bolopé bérdaggom sé:komsin bérbegmang

Di:lígnam gunjipé ditu:la dagla atéré dung ngo

Mé:pa: mé:pal míryaddag

Édílosin tatkíma:nam gomug mugnamdém

Tomi: tomi:l tadyémíl tatpa:tídag tatsud

Mé:líg mé:lígla asiné kigékang

Édé ma:nyídém mé:payémílo pésotídag

Lékoda mé:pa:língkuma



Lékoném Pésosudag 

 Hasna Mipun

Nok tatponé gomugdé:son 

Asin ara:bo léppírpé pírgabdung 

Ngok asin mo:píso. 

Turra du:nané alangko bidung 

Nom longéko ka:begmanggomson 

Nganamsé:sin ngapoma:pé idang 

Nok gomugdém longéko tadbegma:yémíloson 

Yummém yummi: angkuma:pé idu:n! 

Sé:ko ludang mo:píso 

Naré:né asin kanéko kamang émna? 

Ngom lubilang 

Ngo bím nok do:yíngko kíbipé 

Sanpéné appun amí:dém 

Néyyé-néngan nganla jarmokunam agomko. 

Lékoném mé:mosudag 

Nok manyi:bok miyum dé:lang ngo? 

Lékoném pésosudag 

Nok méngkampé ibila:yélang ngo.

Ngoluk Do:lung Mongku 

 Sunil Pe:gu

Ghuli do:lung, Lokhimpur 

Ngoluk do:lungé mongku ghuli émdo 

Ngoluk do:lung ghuli pa:tang aminé kadung 

Kerkota obonori bidyudla 

Ghuli pa:tang aminé léppíré katomang 

Émdaggom, 

Ta:toké aku do:yingé rémku arémé 

Ta:toké du:téngé rémku mirémé 

Urom po:sumké papu:nam bogum sí:lung 

Dungko turboko mo:diyé 

Sité Menjég o:la dungko 

Rémté rémku mirémé rémko 

Ta:to ya:yoké aku dítaglokké 

Do:ying kínamé kadung 

Galong, dompolang patumna 

Létog sí:lung, galong pabog abungé kadung 

Mé:pa:lígdung ta:to-ya:yo nolum 

Urom-po:sum, gumín so:ying kídí:nom 

Kumpa:sudung po:sum 

Noluk mimi ao ommangém 

Lo:dípé turyar moteika. 

Pékog

 

 Ranuj Kumar Payeng 

Aríg ísíng kama:mílo 

Donam tí:nam kama:ye; 

Donam tí:nam kama:mílo 

Turnané tornam kama:ye; 

Turnané tornam kama:mílo 

Pékogé kogye 

Pékogé kokmílo 

Agomé yogye 

Dírbé yogye 

Opíné yogye 

Dungko dakko kama:ye; 

Dungko dakko kama:mílo 

Pékogé kogye 

Pékok kokmílo 

Aín murkongésin 

Goparé bugye.. 

Mimo:sém ésa:mopémílo 

Mo:lungéng geyom mopa:ye 

Péiyi-péttangém ni:tom tommopa:ye 

Simín sikeyém dungkoko bipa:ye 

Asi ésar pédongém turnam léga:pé pa:lídomílo 

Mo:lungém aya:namdé 

Nok asinang arabok yelampé ipa:ye 

No ékuma:mílo pékok kogye 

No ékuma:mílo ngosanpé sannye 

Alo sapsabye 

Turnané bélamdé 

Goparé bugye 

No pékok kogye 

No pékok kogye. 

Miyum Oipuli 

 Dipkesh Kaman

Lekekémpé Oipuli dogném ka:bektokumang 

Nom rége:l gémopénam konémsin 

Silo aín mopa:yé, gébige:l no kangkanpé sepayé! 

Méyumké nom mé:pa:danna ma:nam ma:nyi:do 

Ka:to nok dumsigdém bérsurla 

Nok yalodé kapil oríg-gíríksudan! 

Lo:díp pu:po-jarpola du:yénémpé, 

Turbug asinso no:pak kéra:so du:tíyénémpé. 

Miyum Oipuli... tuptaso nom adla lé:tagbo:pé 

Turko dungkéngso:sin nouwong émdag, 

Pédong na:n bí:sin nok aminno ayang pédongko 

Gompotpém oa:dag. 

Síkírdém métagbong silo nok légangé 

Ansí:né sikur asiso:sin dagbutsula dung 

Tapad, gu:sung-gammang régdaggomsin. 

Gagor ané pígodo tokama:bone bérya:sulígla 

Do:nyi ka:yémíl ajon lédíl so:mankol gíma:bo:ne 

Mé:pa:l dung, mé:pa:tíyaryé sima:dodo:pé. 

Ami tatkol lukaman Oipuli yogné mé:pangém 

Du:risu ara:so ami kindopé lulen-yéku émnamdé 

Silo mé:pola mé:pa:tíyé. 

Oipuli! Apong tí:daggom mitpansu:mang 

Tukké yaddaggom mitpanpémang. 

No dung silo angké:bo du:yé-du:yartíyé 

Miyum Oipuli... 

Asinang Onam Líganga 

 Biliyom Doley

Gali, Jonai 

Ginmur po:lo a:yekumílo 

Sínggi appuné punnyékumílo 

Líganga nom anguru:péi asinang oya:dak 

Asinang onam líganga 

No lomgorla a:bilangka 

Nok mímbír ya:meyé 

Murong okum lottalo 

Nom toya:la dung 

Lekeké oi-ni:tomém mopé émna 

Lekeké mé:bo kabaném ban-ge:la 

Gumrag paksongém so:pé émna 

Lígangoi líganga 

No lomgorla a:teipén 

Talíng ékkamkokki ra:nam ampi apindém 

Eyeg adinkokki ké:nam pe:red oyí:dém 

Abarungkoi ika:bong do:kíkuma:né 

Ngosankokki ké:nam pe:red oyí:dém 

Take: talapkokki kígnam ngosandém 

Anguru:péi asinang odu:bong 

Asinang onam líganga no a:míloi 

Dopé émna moninamsudanla mé:tu:bong. 

Ya:yoké ké:la lé:nam 

Nogin po:ro apong dé:sin írkurakka:bong 

Namop namanna alangé lendu:bong 

Ongngosin ngosanpé ika:bong 

Adinésin dinsanpé ika:bong 

Ya:yi bí lu:dak 

Ali-a:ye lígang longédo 

Doboyé émna lé:la mé:tung 

Asinang onam ali-a:ye líganga 

Anggor tobo:pén. 

Mo:té:lok du:né 

Ajon arumésin gípíngamdungkubong 

Do:lungí:sok du:né na:né, youwoi na:ní bulusin. 

Lo:le: ni:tomém mola so:yir sudungkubong 

Ba:bu, ka:kí, ba:boi bulusin 

Dumdum lu:piyém manna yapako pilígbidu:bong 

Sí:sang mímbír ya:me: mé:pola yírtaksudung 

Asinang onam líganga 

No a:dan du:bong émna 

Asinang onam ali-a:ye líganga 

Asina:sok mé:bosunam líganga 

No yampo a:du:bong émna 

Appíngéi mé:podu:bong 

Asinang onam líganga 

No a:dung émna:min 

Appíngéi siddíko mé:podun 

Lígangoí líganga 

Lékoda a:bilangkuka.

Ngommíng Ngo Taudung? 

(Pu:mu asilo jí:yudné ngok sí:sangko 

Janji do:lu:dém mé:pa:la) 

 Amorawoti Dole: Pe:gu 

Jonai 

Ngok sí:sangko bédangkídí:dé silo okolan? 

Ngok o:-ba:bubí lo:dísém gíboko aríg béda:dé? 

Bíro-bírmang berbutsul ursuko pígo béda:dé? 

Ba:bubí dírdang-turji ongo jobomkuko a:né béda:dé? 

Pogolokké keno:l dukkoku 

E.N.D selami béda:dé? 

Ma:mobuluk lédulo gímínna 

Oyíng oko, ésíng nako 

Sí:lung béda:dé? 

Ngom silo sé:ko lubiyen? 

Bornoiké amír tayédo 

Ngok le:né miksidé 

Bérag émna díletkang, 

Bí ngom lubimanggom ngo kinto 

Bík amír kéígbo 

Ngok sí:sangko bédangkídí:dé 

Du:pakkang émna.

Nom Ngo Aipé Mé:tagai 

 Mitradev Pegu 

Longékolo nom ngok turnané émna mé:sutagai 

Asin domírso nok aminéméi attagai 

Nok amikdé do:mírtok unné takarai 

Silo édé takarkírídésin untokumang. 

Édé longédo ngo noggongkai 

Empigela no ngokképé ila:mangai 

Nappa tu:yi:so bojéko agomé lendagai 

Émpigela nom lulangeitomang 

Ru:nébí tuptaso adlíglai métaga:son 

Madaggom pa:la:ma:nam ngasodko. 

Su:pak édémbulum mélí:tokuma:bong 

Lulí:tokumabong, mé:dír miksésin lentokuma:bong 

Basss! aro agom apirongko 

Nom ngo aipé mé:tagai 

Mé:namsok aréko bila:manggom. 

Mitpan supé émna mé:du:bong 

Émpige:la po:péké do:yingé 

Asin kinamé 

Mé:bo manyingé 

Silosin asin ara:bogyam airu:pé ara:bo 

Pargabla dung.

Mé:tom Longé 

 Kenedi Morang

Lendo-dokké Mongulio tokké 

Sainangém gíbadla Tibbotém togbadla 

Dité adi:tokké toglenla gíné 

Ngo Misingé réngam aoko. 

Sainang réngamé Tibbot réngamé 

Ílíngém i:daggom ngasodém bidaggom 

Oné anéké gomuk agomém lu:yarla du:né 

Ngo Misingé réngam aoko. 

Bomlíngém bomdaggom gélingém gédaggom 

Ali-A:yé Longéso, Gonro ugondém mibu-galugdém gélígoima:mílo 

Ajon-arumko ka:lígoima:mílo taniyémpé mé:suma:né 

Ngo Misingéi réngam aoko. 

Dolíngém dodaggom tí:língém tí:daggom 

Ali-A:yé longéso, purangéi apinko pe:redoi oyíngki 

Po:roi apongko tí:lígoima:mílo 

Doto tí:tomanémpéi mé:suma:né 

Ngo Misingéi réngam aoko. 

No mímbíré bírdug appuna 

Bíryarla du:teika líne-gené appunpé 

Punyarla du:teika karpumpuli:pé 

Méngkin asinki me:yarla du:teika 

Réngam asiné kampola du:dopé 

No Misingéi mímbíra bírdug appuna. 

No ya:meya sí:duk ísínga 

Sí:yarla du:teika tapum-tariyé takídei kíddaggom 

Muglíng ésaréi sarlíngém sardaggom 

Tannéi ísí:pé dírma:pé du:teika 

No Misingéi ya:me:ya sí:duk ísínga. 

Siloké longéso, sí:sané aobí ngansa:né omébí 

Méngkin asinki kangkin amikki 

Alé:lékorém kormínéi lado:pé 

Réngam agomém lupo:pojarém lubi:la:dopé 

Ajéng jé:yarém jé:mínéi kindopé 

Sé longésé Ali-a:yé longésé mé:tom longéko 

Mo:di amo:so réngam ríkkumsunané lékopé idopé 

Pía:né amo:so réngam kangkinsunané ta:niyé émdopé 

Kumdung do:nyi nom kumdung po:lonom 

Kumdung ru:né-píné nom 

Sé longésém aila du:motei turyarla du:motei 

Réngam pu:po:jarpo:la du:dopé.. 

Silo Mélo Po:ré Bojédung 

 Jharnajili Doley 

Jonai 

Silo mélo simín asin géné taniyé abadung 

Nok mé:pom ka:yodné po:ré bojédung 

Bulu amik mé:po turgodém roddung 

Lambé pédu:lo dakkom dagromla aima:pé luge:dung 

No kapé kinsuyén bulu sé:kon? 

Bulu nok kérang kétakpé du:né ajoné 

Lo:dísém ti:né ngamné agomém lujoné 

Nok doko arémdo domínné 

Yupko asubdo yubmínné 

Émpige:l.. longéko sumyo simín kísap nom régla dopagyé 

Bulu yakan asin génné bulu kampon nappang kanné 

Nok mé:pom rodge:l bulu mé:pol yírné 

Bulu aíké arrém abar barnyilok kopaksunné 

Bí mé:sudag sé mo:písé bíggongké 

Bí mé:sudag sé mé:posé bíggongké 

Édé simín asin géné aiman tani:dém 

Ngolu kangkinpa:yé 

Buluk lékor korroddém kinpa:yé 

Bík imur-gímurém, aro agomki lusarpa:yé 

Rinji mangkampé ma:né 

Bík alagém ngoluk lottalokké yapu:supa:yé 

Sé aré kané ru:néké binam turgotsém mé:pol turpa:yé

Anu Appun 

 Dharmakanta Koman

Anup nganenné appun appunpén appunko, 

Mé:la du:nam asin arang agomko. 

Du:bong mé:bonam appun amíngko, 

Édé appundok omépuli ko punpé mé:dung! 

Ka:tíla du:pé appun amíngdok punnamko 

Punmopé mé:dung appun amí:dok punnamko ngokké 

Mo:lég lottaso. 

Do:nyino aipé ka:po:yo appunmé lepo:yé, 

Ésara no:sin sarpo:yo appunmé sartablíkpéké. 

Pédonga no olíktok 

Appun-bí jarsa:po:yépé. 

Punna du:né appunmé 

Ammem punmoma:p lo:díp ka:la du:língé. 

Ngok lotta:sok appuna 

Ammem pun-yok molí:mang! 

Po:píra no:sin dénga:po:yoka? 

Punna du:né appunmé ngoé ka:tí:suma:da. 

Lottad punné appunmé punmoge:la ka:língé.

Ali-A:yé Lígang 

 Lilon Jyoti Kuli

Dítagé gídung, dítagé a:dung 

Ginmur po:lo a:dung, lígangé a:dung 

Misingké opíné, í:ré pongkíré 

Ali-a:ye lígangém ga:dung. 

Pi:rom gígdung, amniyém piddung 

Réngam lékopé lígang moí:rdung 

Érang pérablo, adin dinsané 

Méram méramlo ongo ngosané 

Nogin, po:ro, purang apin 

Ya:me: mímbíré yirmané so:mané 

Lo:le: ni:tomé, gumrag so:mané 

Misingké dírbé í:ré pongkíré 

Édé ngolukké opín jarrobbonané 

Lounné dírbé Ali-A:ye Lígangé.

Me:rang Opín 

 Rahul Chandi

Lo:dém mé:pola du:né opíné, 

Kamang bulumyam gerya:né, 

Kamang bulumyam kaya:né. 

Kamang bulukké mé:dírmé:songé, 

Kamang bulukké pamín-momíné 

Kamang néka:pakangé, 

Kamang lo:si-lo:bagé. 

Akoném akoné ka:dumsudag, 

Akoné akoném gerdumsudag. 

Akoné akoném bisumínsuné 

Akoné akoném aya:mínsuné 

Lo:dém lo:bagma:né 

Me:rang opíné.

Mé:tídakson

 Prodip Pegu 

Chirakhowa, Gohpur 

Nom méngge:ma:bong émna:sin 

Nommong mé:tídakson. 

Kapidu:son kinsumang, 

Asinsé nommong mé:tídakson. 

Sa: lékkongko toríksukítei, 

Ngok mé:nan asinséi mé:podopé. 

Sa: lékkongko mé:dag émkítei, 

Ngok asiné mé:podopé. 

No:sin kindu:péma:lang, 

Éddíko nom ngo aipé mé:dagji. 

Nomsin lubisutagma:lang, 

Ngo nom éddíko mé:dagji. 

Kapila méngkinbiman, 

Ngok asin mé:namsém. 

Kapila tatkinbiman, 

Ngok lunam agomsém.

 MÉ:TOM 

Ta:toké Ayang 

 Jodu Bori 

Nalduwar, Majuli 

Ngok ajji:lo ta:tobí 

Ngom aya:dagai 

Ngok pola du:dagdo 

Ta:tobí luyir abok ludagai 

Aipé polangka émna. 

Ngok a:l gurra du:dagdo 

Ngom ta:tobí aya:dagai 

Ta:toké ayangém 

Silosin mitpanmang. 

Ngok ajji:do ponam légangé 

Ngok ta:tobí aipé mé:dagai 

Ngok so:bo lédílo gígo:dag ayirdo 

Ta:tobí pobuk ponam légang 

Aipé mé:dagai 

Ngok ta:toké ayangém 

Turdak takamso mitpanma:yé 

Ta:toké ayang aropé ngo mitpanma:yé. 

So: mo:píso ta:tobí kamanggom 

Ta:toké ayangyem mé:pala du:yé 

Ngok turra du:dag Takamso 

Ta:toké asinang Onam 

Aya:ngém mitpan kamayé. 

Ngo okolei du:daggom 

Ngo okoei dagdaggom 

Ngok du:té:lo, Ngok gítílo 

Ta:toké aya:ngém mé:pa:la du:yé. 

Ngok ta:tobí sé mo:píso kamanggom 

Ta:toké ayang du:yaryé. 

Ngok ajji:dodo, Ta:toké amír tayé:do 

Ngo bargo:la du:dagai 

Ta:tono mo:píso kamanggom 

Ta:tono ayangko bilangka.

Tomsog 

 Monuj Lagasu 

(1) 

Dung ko: ako amin bíkké Makka 

Bím lagidag Sigret, Sada, Gutka 

Odokkésin tí:dag Bang 

Borbadnamdé katang 

Lédípé bíkké kinam a:namdé pakka. 

(2) 

Mirém omé Roji 

Lebel léngkanpé kaji 

Alébé hai hil 

Nappa:do smail 

Sé:ko bím potai la:yén marito baji. 

(3) 

Yakepné Yakaké Murko Mé:díré 

Méngko sakkolo mikkorodung Amigé 

Pirme:n ongo rédag 

Abayang angara dodag 

Murra murko: sabmur sabyaré. 

(4) 

Pa:tang akolo dungai tatíg pirumko 

Pirnyiko dungai Tígné, Tígbo apirko 

E:me e:pongé 

Ge:mínsunamé 

Pamín-ge:mín bojela ba:dung kébangko. 

Ma:nyinga:ne No?

 Ujjwaljyoti Pegu 

Lupé lupé mé:la:sin lula:toma 

Ayangko bipé émna mé:la:sin 

Bélamé yoggékang 

Nappangé pígékang 

Lupénam agomko, 

Bipénam agomko. 

Pédo:pé odung miksi abungko 

Kampon mukkangé yí:lupto 

Dungkang pésola nok yirra ka:namko 

No mépagla gídagdokké 

Mé:ngki méngadla du:moge:la 

Ko:néng no gípagdung 

Rongki rongkiyé asin kumsungé 

Mé:bola binam ayangko 

Lo:dém mé:pola du:moge:la 

Katomang asin ayangko 

Sé kamponé mo:píso 

Ka:po ka:po oinok sege:la gínamdé 

Kalí:tagai nom 

Lo:dém ka:la dumanggom 

Lígang longédo 

No mépagla gídaggom 

Ngo mitpanma:yé 

Miksi réjinla kabla dungge:la 

Asinang onamé émdag lunamdém

Kapé Mé:dun Misinga? 

 Bipin Taye

Rai Chapori Dolopa 

Oko yumra:lo nolu dursisudun? 

Se:kom pésola duggénsudun? 

Dugla dukpísuyelang kémoné ayirdém 

Durra durpísuyelang 

Ngasod a:nédém. 

Lo:dípé duggénsumílo ngolum 

Amme yírka:yépé.. 

Mé:tid-ka:tidyépé ngolum 

Amiké opín taniyé. 

Gasum dítagé gíbatka:bong 

Silopé kosa:la agomko lula:tomang ngolu 

Migom taniyésin yatkup yadlabdung 

Ngoluk kinmangém ka:la 

Appíngéi samtitpé mé:dung. 

Émpila réngama!! Silo, 

Ngoluk a:ngém léngkansunané 

Adíé angka:bong.. 

Miro miga:no yoksadém jonggapto 

Abutani:ké omma:ngé ngolu 

Gílennai kajé mimag mokapé. 

Tatponé ané agomsém turyarmola:jé 

Agom Migangké 

Gertung agerém gerrobbomnangkujé 

Noresh, Boga, Onjana:ké i:dok arédém 

Ngolu la:lenlangkujé.

Asinbok Agomko 

 Hiranya Taid 

Ngok a:ngbo 

Ísíng amíngko ngansa:dung. 

Bírdug kama:n adído 

Méngkinma:n ayang a:nébo 

Kangkinma:nam péttangko dénga:la 

Akangko gi:lígdung. 

Aserpé serné 

Pi:ro anné okumko. 

Dé:la gído 

Línge:né péttangko 

Alab labyi: lapsa:la. 

A:pugbok apong po:síkko tíngge:la 

Ni:tomém tomrobdung 

Ngok angké: tayé:so tedge:la. 

Édébulu a:nélok déupé 

Nési asipé kagrobdung 

Ngom kagyudlígto. 

Atéré térkodo 

Ngok adí lottado 

Alagém laktarra 

Ngo toríksuto. 

Bí lí:líng midumnok 

I: tí:né yallo. 

Bí su:pag alabém 

Labyi: lapsa:la so:dung. 

Bí su:pag dop dopaila 

Singag singagla yirdung. 

Bík yírnam amig pa:ri:do 

Ngok a:pugbok gené a:yekídí:dé 

Lí:robbompé irobdung 

Líga:no Édílo A:yén 

 Anil Doley 

Siga, Jonai 

Ísíng agléng aglé:lo 

Gené anné jardu:bong 

Dagdung daktog ésaré 

Bo:bi lo:li:p sardu:bong 

Mibo galug, gonro ugon 

Géru:-bomru:suge:la 

Toya:la dung nom 

Líga:no édílo a:yén? 

Ngok mé:pon asinsé 

Singgi appunmé tatkído 

Murong okum lottado 

Lo:le: ni:tom mokído 

Bírsai, Aiséng, Migom bulu 

Géru:-bomru:suge:la 

Toya:la dung nom 

Líga:no édílo a:yén? 

Po:ro apong írka:bong 

Kamro ékkam sanka:bong 

Kombong appun punka:bong 

Kouwung péttang kapka:bong. 

Toya:la dung nom 

Líga:no édílo a:yén?

Lékoda Lígang 

 Sadananda Patgiri

Ali bírdugdém 

Appun do:jíg boma:la 

Ansí:né ésar sara:la 

Punga:do lékoda lígang 

Gumrag songa:la 

Dumdum-lu:pi: bé:la 

Í:r-pongkírpé, kekoné-kesagé 

Élé gía:do 

Ngok aipé mé:nam lígang. 

Sí:sa:né asinsém 

Ríntumla:mang lo:dém-lo:dípé 

Asinang omodag 

Simadné Ginmurdé, 

Gatpun, Singgi appun yí:lendodoi 

Ngok angké:bo oangkang aya:nam do:pitko 

Simadné Ginmurdé a:míloi atpé mé:dag 

Anu anu mé:tomko 

Kuri Línkodok 

Ayang mé:pa:la lo:dípé 

Taddo nok do:yingko! 

Éde je no yabgodok bérsurra 

Muksup yíngkodo 

Ansí:né ésarko ka:la du:namdém 

Rouwé-rokomko. 

Édé longédokké 

Mé:nam appun punnenna 

Ayang a:né billenkang 

Ngok ayang bélamdo, 

Odungíngké nokkéla:-ngokké 

Aya:dé jarsangkang nésin-néyinpé 

Démpila lígangé ngok mé:bomsunamé. 

Dokké lígang gía:mílo 

Gumrag songa:mílo 

Po:ro apong tí:namko 

Ayang do:yingko lendag.

 

No Sé:kobín? 

 Kushal Mili 

No sé:kobín? 

Ngom yuba:-donga:la:ma:dopé 

Lo:dípé méngaksumodun, 

Lékoném ma:nyi:bo gía:dag 

Lékoném runggokpé a:dag mé:pokandopé 

No sé:kobín? No okolokkén? 

Nok agomém, nok gomugé 

Tatpa:yémílo ngok yubla du:né 

Asinsé jé:sanggédag 

Kinsul ka:yémílo yalopé ipagdag 

No sé:kobín? 

Nok dumsígém ka:pa:yémílo 

Ngok asinsok yí:lumna du:né 

Mukkangé yí:paggédak 

Siya:la gíné po:lobí lolad latsa:dungku. 

No sé:kobín? Nok amin okkon? 

Nom kangkinsuma:pé asiné ola du:do 

Nom ríksukíma:pé mé:la du:do 

Édílo ríksuyen nom atéroi atérpé.. 

Édílo sarpadyen nok ayang ésardé.. 

Édé ésardoi ngo sarmínna du:pé 

Nok ayang mago:la, 

Jé:la jé:lai lubisupé nom 

A:pí agomkoi ngo mé:la dung émna 

Ajjo:koi tadbilang 

Ngok ayang agomko 

Ngok ayang agomko

 DO:JÍG 

Do:jíg 

 Priti Pa:dun

Dhemaji 

Mé:bomsunama, 

No ésa:la dun? Ngok asinsok méngkamarpé no ésa:la 

du:pé. Nom longkokébo airu:pé asinang onamsé bojéla 

dung. Lugu: luwa:ma:pé nok agomo:ngém mé:pa:la 

kénong-tí:líng a:mang, yummi:-do:miyésin a:mang. 

Ésongka no kapéi mé:la du:son! 

Éi taddun, longékoném no émna ame:né bírodém ngo 

ka:murto, no émna ma:yi:bo:sin yirsa:to, gamigémsin 

kebmurto, ajonmésin gogmursuto. Anyingé:! Kapidu:song 

ngo kinsumang. Nom ríksudodokké yuba:la:mang. Nok 

agomo:dé moyosudag, sémpéi idang asinang onamé 

dunga:la:ma:p dídí-kokola asiném jinmo:dang? Amik 

tu:bíso jardanna du:bong miksiripin jarpunpé, ayangpin 

ba:ri:pé nom ríksudokké. 

No kindan nom ngo lékoda ka:pa:yésong émna 

bérrango du:do lamté kéré:pé, ríksuyéson émna gímando 

do:lung nérí:pé. Miksé len-gékang amiksé, léppo píngékang alébé. Émpige:l gomukkosin tatpa:mang, 

dumsíkkosin ka:pa:mang émpila ngok asin ayang agomsém 

do:jíksokki akunpé kunníktung. No aya:la pobilang. 

 Nok Aya:nam 

 DO:JÍG 

Do:jíg Akolok Kabnamko 

Aya:nam, 

No kindang turnamsé aipé ngasoddag !!! 

Mitpansula:ma:nam ma:nying ako ménmín ménmínna 

mé:dírmodag okkosin kama:n ngok asinsém. Kablíng 

réngadé ní:pin bomdag rongngam pésamné angké:sém. 

Kinsumang ka:begma:nam asinsé okkoméi mala 

kabdagsong! 

No tadbegdang angké:sok bedke-bedyela bugnamsém, 

nambegdang asinsém ukserenamsém, asin ara:so írga:né 

métungémpé punna dung mé:dír appunko! 

Nok sí:sang bírdug ésaré ngok asinso sara:tídag. Ngok 

asin po:pírsé madag ayang appun alangko. Ngo tatkítungai 

bírdug ni:tomko. Okol yokkangkun édé tadkínam ni:tom 

to:ri:dé, ngok asinso jíglígge:la mé:dír moimangko! 

Longékoném ngonyim do:nyibí yírka-luposudagai, 

odo su:pag mukkang alumko méma: téttépé ménbomdag; 

édé ngonyim ngasod modung, mé:dír modung, kémo 

modung! 

Nok asin mo:pído ngokké gené do:mírko dungai. Odo 

po:lo loundagai, pundagai língko takar appuné; édé silo arré 

kamang. Su:pag mé:sudag no:lang ngo ka:la ka:pí:ma:nam 

a:né kekon kesagé. 

Sa: aipé! 

 Ni:tom Sungkrang

30